Eygló vermir Austurland
Samstarfsverkefni á grunni hringrásarhagkerfis, orkuskipta og nýsköpunar á Austurlandi, sem hlotið hefur nafnið Eygló, var stofnað formlega í dag. Skrifað var undir samstarfssamning þess efnis í Fljótsdalsstöð milli Landsvirkjunar, umhverfis-, orku- og loftslagsráðuneytisins, Austurbrúar og sveitarfélaga á Austurlandi; Múlaþings, Fjarðabyggðar, Fljótdalshrepps og Vopnafjarðarhrepps.
Heitið Eygló vísar til öflugasta orkugjafans, sólarinnar, og til bjartrar og kraftmikillar framtíðar. Verkefnið er til fjögurra ára og nemur fjárframlag stofnaðila alls 240 milljónum króna. Meginmarkmið Eyglóar er að efla nýsköpun og þróun, með áherslu á að bæta nýtni hliðarstrauma og flétta þá inn í nýja verðmætasköpun. Þetta styður við vöxt sprotafyrirtækja og fjölgar tækifærum til þátttöku í alþjóðlegum rannsókna- og þróunarverkefnum í samstarfi við fyrirtæki á svæðinu. Eygló er fjórða svæðisbundna samstarfsverkefnið sem Landsvirkjun og samstarfsaðilar hafa komið á fót, en fyrir eru Eimur á Norðurlandi, Orkídea á Suðurlandi og Blámi á Vestfjörðum.
Ýtt undir hringrásarhagkerfið
Ætlunin með Eygló er að leiða saman aðila til að afla alþjóðlegs fjármagns til tilrauna, rannsókna og þróunar á orku- og loftslagsvænum lausnum. Með auknu samstarfi fyrirtækja og opinberra aðila er ýtt undir verkefni sem byggja á verðmætasköpun úr vannýttu hráefni, bæði úr því sem er til staðar og því sem verður til vegna nýrra verkefna eða framleiðslu.
Ráðgert er að Austurbrú auglýsi eftir sérfræðingum til starfa við verkefnið innan skamms.
Sameiginlegt átak og stuðningur skiptir sköpum
„Hér gefst okkur tækfæri til að virkja það hugvit, auðlindir og þekkingu sem fyrir hendi er í landshlutanum. Sameiginlegt átak og stuðningur öflugra aðila skiptir þó sköpum eigi betri nýting auðlinda og frekari verðmæta- og nýsköpun að verða að veruleika. Það er ánægjulegt að ráðuneytið sé slíkur bakhjarl.“
Guðlaugur Þór Þórðarson,
ráðherra umhverfis-, orku- og loftslagsmála
Samstarf ólíkra aðila er lykillinn
„Lykilinn að árangri við leit að sjálfbærari lausnum til framtíðar er að ólíkir aðilar vinni saman við að koma auga á og þróa áfram nýjar lausnir. Það er mjög ánægjulegt að sjá þetta samstarf milli sveitarfélaga á Austurlandi, ráðuneytisins og Landsvirkjunar verða að veruleika og þannig styðja við uppbyggingu þekkingar og framþróunar á sviði orkutengdrar nýsköpunar á Austurlandi.“
Sigurður H. Markússon,
forstöðumaður nýsköpunar hjá Landsvirkjun
Byggjum á nýtingu svæðisbundinna styrkleika
„Eygló rímar vel við skýra sýn Austfirðinga um hvernig takast megi á við þær áskoranir sem snúa að loftslagsmálum og hringrásarhagkerfinu sem lagt er fram í svæðisskipulagi Austurlands. Eygló byggir á því að nýta svæðisbundna styrkleika, innviði, fyrirtæki og mannafla til að mynda frjóan jarðveg fyrir nýsköpun og aukna verðmætasköpun. Þessi grunnur og sá slagkraftur sem stuðningur Landsvirkjunar og ráðuneytisins gefa með þessu verkefni mun án efa nýtast öllu Austurlandi til framfara.“
Berglind Harpa Svavarsdóttir,
stjórnarformaður Austurbrúar og Sambands sveitarfélaga á Austurlandi
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
