Nýtt ferðamynstur um Ísland
„Með því að fljúga beint til Austur- og Norðurlands erum við að þróa nýtt ferðamynstur um Ísland þar sem miðpunkturinn er fjarri höfuðborgarsvæðinu.“
Höfundur
Jóna Árný Þórðardóttir, framkvæmdastjóri Austurbrúar, skrifar um tækifærin í millilandaflugi:
Með heiminn við bæjardyrnar
Við höfum lengi unnið að því að byggja Austurland upp sem heilsársáfangastað þar sem gestir okkar geta dvalið og notið alls þess sem við höfum upp á að bjóða. Tilkynning þýska flugfélagsins Condor í fyrrasumar um að hefja beint flug frá Frankfurt sumarið 2023 til Egilsstaða og Akureyrar markar því mikil tímamót.
Þessum tíðindum fylgja mörg tækifæri fyrir austfirskt atvinnulíf svo ekki sé minnst á lífsgæðaaukninguna fyrir allan almenning. Það var nefnilega ekki einungis að opnast bein leið til okkar, heldur jafnframt gátt út í heim. Frá Frankfurt liggja leiðir til allra átta.
Langur aðdragandi
Þegar flugfélag tilkynnir flug á nýjan áfangastað liggur mikil vinna að baki. Það á svo sannarlega við í þessu tilfelli en Austfirðingar hafa í gegnum tíðina haft metnað til reglubundins millilandaflugs um Egilsstaðaflugvöll. Þegar Covid skall á nýttum við tímann vel og í samstarfi við Markaðsstofu Norðurlands, Isavia og Íslandsstofu var ræktað samband við flugfélög ytra. Flugvellirnir á Egilsstöðum og Akureyri voru kynntir á fundum, heimsóknum og ferðaráðstefnum, markvisst unnið með ferðaskrifstofum og öðrum hagaðilum á markaði þar sem samkeppnin er gríðarlega hörð. Sjálf fór ég í tvígang til Þýskalands til að greiða þessari vinnu leið og uppskeran var tilkynning sl. sumar um beint vikulegt flug frá Frankfurt 2023 með flugfélaginu Condor til Egilsstaða og Akureyrar. Flugfélagið er geysiöflugur samstarfsfélagi í uppbyggingu nýrrar tegundar af ferðaþjónustu á Íslandi, þar sem ferðalangurinn flýgur beint og dvelur lengur á áfangastaðnum Austurlandi.
Mikill áhugi á Íslandi
Áhugi Þjóðverja á Íslandi er þekktur og þeir hafa í gegnum tíðina verið duglegir að heimsækja Ísland. Um flugvöllinn í Frankfurt fljúga yfir 80 flugfélög og tengimöguleikarnir eru til yfir 300 borga um allan heim. Því er ljóst að gestir okkar í sumar munu koma víða að þótt Þjóðverjar verði í meirihluta.
Með því að fljúga beint til Austur- og Norðurlands erum við að þróa nýtt ferðamynstur um Ísland þar sem miðpunkturinn er fjarri höfuðborgarsvæðinu. Þetta breytir miklu fyrir ferðaþjónustuna hér, því gestir okkar munu skipuleggja ferðalagið um Ísland út frá okkar landshluta og við gerum allt til þess að tryggja að þeir dvelji sem lengst hjá okkur.
Í þessu liggja gríðarleg tækifæri og það verður spennandi að sjá þróunina í framboði á vörum og þjónustu fyrir ferðamenn sem koma með beina fluginu, bæði nýjar vörur og þær sem fyrir eru en vekja má betur athygli á. Með því móti byggjum við enn frekar undir framtíðina og framþróun fluggáttarinar.
Markaðsaðgerðir eru þegar hafnar í Þýskalandi og höfum við fundið mikinn áhuga hjá ferðaskrifstofum ytra sem vilja kynnast þessum hluta landsins. Því þótt Ísland hafi notið fádæma velgengni sem vinsæll áfangastaður er Austurland enn vel falinn en spennandi fjársjóður.
Samvinnuverkefni Austfirðinga
Og svo eru það tækifærin og lífsgæðaaukningin fyrir Austfirðinga. Okkur eru allir vegir færir þegar til Frankfurt er komið. Borgin er steinsnar frá Móseldalnum, einu fallegasta svæði Þýskalands og Munchen, hinnar litríku höfuðborgar Bæjaralands, þar sem sjálft Oktoberfest er haldið.
Sjálf hef ég bókað far fyrir mig og manninn minn í vor. Við leggjum af stað til Egilsstaða frá Norðfirði upp úr kvöldmat á þriðjudagskvöldi. Fljúgum um miðnætti og verðum komin til Frankfurt eldsnemma á miðvikudagsmorgni. Þaðan tökum við beint flug til hinnar sögufrægu ítölsku borgar Flórens og lendum um hádegi; beint í gómsæta máltíð á notalegum veitingastað í þessari ótrúlegu borg. Á dagskránni er svo að njóta lífsins í því sem á vegi okkar verður, eins og sinfóníutónleika þar sem Árstíðirnar hans Vivaldi verða fluttar í gamalli kirkju. Ekki amalegt það!
Við lendum á svo á Egilsstöðum á þriðjudagskvöldi, klukkan 22:20. Ætli við verðum ekki að líkindum sofnuð á Skorrastað um miðnætti, laus við umstangið, tímann og kostnaðinn sem fylgir því að keyra eða fljúga heim að sunnan.
Ég vona að Austfirðingar taki vel á móti þessari nýju þjónustu. Frá 16. maí til 24. október verðum við með heiminn við bæjardyrnar. Nýtum okkur það.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
