Ný tækifæri - aukið framboð menntunar
Það er von okkar að með kennsluforritinu LearnCove verði fjarnámið enn aðgengilegra og notendavænna fyrir okkar nemendur. LearnCove skapar ný tækifæri í framboði menntunar og fræðslu fyrir íbúa Austurlands.
Framfarir í fjarkennslu
Nýverið lauk námskeiðinu Matarfrumkvöðullinn sem var samstarfsverkefni Austurbrúar og Hallormsstaðaskóla. Þetta var fyrsta námskeiðið sem Austurbrú notar kennslukerfið LearnCove en það hefur víða reynst einstaklega vel í fjarkennslu og mun að vonum gera okkur kleift að auka framboð á fjarnámskeiðum og lengri fjarnámsleiðum.
Samstarf Hallormsstaðaskóla og Austurbrúar
Á námskeiðinu var farið yfir helstu skref frá því að hugmynd að nýrri vöru kviknar þar til hún er komin á markað. Námsefnið og kennslan sjálf var á höndum Hallormsstaðaskóla og Oddnýjar Önnu Björnsdóttur en Austurbrú annaðist alla umsýslu og miðlun námsefnisins til nemenda. Miðlunin fór fram í gegnum kennsluforritið LearnCove en þetta er í fyrsta sinn sem Austurbrú nýtir það til fjarkennslu.
Erfitt að fylla námskeiðin
Það hafa orðið stórstígar framfarir í hönnun kennsluhugbúnaðar á síðustu árum. LearnCove er íslenskur fræðslu- og þjálfunarhugbúnaður sem fjölmargir eru farnir að nota. Kerfið þykir afar notendavænt og auk þess einstakt þegar kemur að tungumálastuðningi. „Með því að nota þetta kerfi opnast enn fleiri tækifæri fyrir okkur að sinna fjarkennslu,“ segir Ásdís Helga Bjarnadóttir, yfirverkefnastjóri hjá Austurbrú. „Ein stærsta áskorun okkar, sem störfum í fræðslumálum á Austurlandi, er hversu landshlutinn er dreifbýll og það getur oft verið snúið að ná í lágmarksfjölda á námskeið. Við höfum í gegnum tíðina ansi oft þurft að fella niður námskeið jafnvel þótt eftirspurnin sé fyrir hendi á Austurlandi. Hún er bara dreifð frá Vopnafirði suður á Djúpavog og vandasamt að fá fólk á einn stað. Tala nú ekki um á veturna þegar færð á vegum er slæm.“
Austurbrú hefur nú þegar talsverða reynslu af því að fjarkenna námskeið og lengri námsleiðir en það er von okkar að með kennsluforritinu LearnCove verði fjarnámið enn aðgengilegra og notendavænna fyrir okkar nemendur.
Tækifæri í fjarnámi
Námskeiðið Matarfrumkvöðullinn er, sem fyrr segir, fyrsta námskeiðið sem Austurbrú nýtir fyrrnefnt kennslukerfi og lauk náminu um miðjan mars. Í námskeiðsmati, sem lagt var fyrir í lokin, kom fram almenn ánægja með námskeiðið og miðlun kennslunnar og annars námsefnis. „Við sjáum því talsverð tækifæri í þessu,“ segir Ásdís Helga, „við höfum í gegnum tíðina unnið með fyrirtækjum og stofnunum að gerð og framkvæmd fræðsluáætlana. En með þessu góða samstarfi við Hallormsstaðaskóla má líka sjá fyrir sér þróun í þá átt að við hjálpum fagaðilum í landshlutanum að skipuleggja námskeið, þar sem sérþekking þeirra er gerð aðgengileg og miðlað til almennings á Austurlandi og víðar með öflugum kennsluforritum sem verða sífellt betri og notendavænni.“
Gerum námið aðgengilegra
Austurbrú hefur mikla reynslu í skipulagningu og utanumhaldi námskeiða fyrir atvinnulífið á Austurlandi. Hjá okkur hafa verið hannaðar lengri sem og styttri fræðsluáætlanir fyrir ólíka markhópa um árabil en meðal viðskiptavina okkar eru sveitarfélög og sjávarútvegsfyrirtæki eins og Síldarvinnslan. Við viljum nota tækifærið og hvetja fagstofnanir á Austurlandi, sem vilja bjóða upp aðgengilegt nám á sínu sérsviði, að hafa samband við okkur. „Reynslan af samstarfinu við Hallormsstaðaskóla sýnir að það er hægt að bjóða upp á mjög góða kennslu án þess að nemandinn þurfi að færa sig um set. Þannig getur sérþekking í Hallormsstaðaskóla verið jafn aðgengileg hvort sem þú býrð í næsta nágrenni við skólann eða á Vopnafirði,“ segir Ásdís Helga að lokum.
Nánari upplýsingar
Hrönn Grímsdóttir
Neskaupstaður
Þorbjörg Ólöf Jónsdóttir
Neskaupstaður / Reyðarfjörður
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
