Flug er mikilvægur innviður strjábýlla svæða og fyrir Ísland sem eyland í miðju Atlantshafi. Kappsmál er að þróa lausnir og vinna að kolefnishlutleysi í flugi, í takt við þróun í öðrum flutnings- og samgöngumátum, með það að markmiði að sporna gegn hnattrænni hlýnun og skaðlegum áhrifum kolefnisútblásturs. Deilt er um hvernig eigi að ná því markmiði en þó eru flestir sammála um það að í framtíðinni verði rafmagnsknúnar flugvélar nýttar í styttri flugleggjum, t.a.m. í innanlandsflugi en einhvers konar rafeldsneytisknúnar þotur nýttar til lengri flugleggja.

Tækifærin í endurnýjanlegri raforku

Vistvænt þotueldsneyti getur annars vegar verið framleitt úr lífrænu hráefni eða úr endurnýjanlegri raforku. Rafeldsneyti er framleitt úr endurnýjanlegri raforku en í dag er nánast allt þotueldsneyti framleitt úr lífmassa. Tækfæri rannsóknarsvæðana liggja í framleiðslu eldsneytis úr endurnýjanlegri raforku sem verður að öllum líkindum notað til að kolefnishlutleysa flugeirann á næstu árum.

Hagsmunaaðilagreining og kortlagning þekkingar

Rannsakendur lögðu upp með að kortleggja helstu hagsmunaaðila sem koma að orkuskiptum í flugi í báðum löndum. Um fimmtíu hagaðilar voru kortlagðir og rúmlega helmingur tók þátt í rannsókninni. Snertifletir á milli hagaðila eru margir en allir eiga einhvern sess í virðiskeðju framleiðslu og notkunar vistvæns þotueldsneytis. Auk þess greindu rannsakendur fyrirliggjandi þekkingu á málefninu og viðhorf hagsmunaaðila.

Rannsóknin var framkvæmd í formi viðtalskönnunar í febrúar og mars á þessu ári og alls voru tekin 34 viðtöl.

Áhugi á grænvæðingu flugsamgangna

Frumniðurstöður verkefnisins voru kynntar á málþingi sem haldið var í byrjun maí. Þær gáfu til kynna að mikill áhugi er á grænvæðingu flugsamgangna sem og áhugi á orkuskiptum í öðrum samgöngu- og flutningsmátum á landi og sjó. Fjöldi verkefna eru í gangi varðandi orkuskipti í flugi og allir viðmælendur vitnuðu í virk innanhúss- og/eða samstarfsverkefni sem hafa bein tengsl við málefnið.

Þá lýstu viðmælendur því að greiða þurfi úr ýmsum málum þegar kemur að aukinni raforkuframleiðslu. Pólitísk umræða um uppbyggingu orkuinnviða sé bæði viðkvæm og flókin enda miklir hagsmunir í húfi. Viðmælendur voru sammála um að fyrst og fremst þurfi að tryggja að innlend framleiðsla sé hagkvæm og verð á henni samkeppnishæft.