Veglegur styrkur úr Tækniþróunarsjóði
Stjórn Tækniþróunarsjóðs samþykkti fyrr í mánuðinum að veita þróunarverkefninu „LÍSA – Lærum íslensku“ styrk upp á 50 m.kr. Um er að ræða smáforrit sem auðveldar innflytjendum að læra íslensku hvar og hvenær sem er.
422 umsóknir
Í boði voru styrktarflokkarnir Fræ/Þróunarfræ, Sproti, Vöxtur/Sprettur og Markaðsþróun og Markaðssókn. Alls bárust 422 umsóknir og er árangurshlutfall styrktra verkefna sem hlutfall af innsendum umsóknum 20%. Í þessari úthlutun er styrkveiting til nýrra verkefna 788 m.kr. en þar sem verkefnin eru til allt að þriggja ára nemur heildarkostnaður vegna þeirra 1.440 m.kr.
Sjá frétt á vef Rannís
Kennslutæki í formi smáforrits
„LÍSA – Lærum íslensku“ verður kennslutæki í formi smáforrits fyrir snjallsíma, ætlað erlendum íbúum sem vilja læra íslensku. Þetta er eins konar „námsleikur“, unninn á grunni fjögurra þrepa námskrár sem aftur byggist á Evrópska tungumálarammanum (CEFR). Markhópurinn er stór eða allir innflytjendur sem búa og starfa á Íslandi og með verkefninu er komið til móts við þarfir þessa hóps og atvinnulífsins um að kenna grunnatriði íslensku auk hagnýtrar samfélagsfræðslu. Auk þess að verður LÍSA öflugt kennsluverkfæri í fullorðinsfræðslu og mun smáforritið jafnframt gagnast í kennslu barna og unglinga í grunn- og framhaldsskólum.
Nánar
Veglegur styrkur
Sem fyrr segir er styrkurinn afar veglegur eða 50 m.kr. sem er hæsti styrkur sem verkefni á okkar vegum hefur fengið frá stofnun Austurbrúar árið 2012. Þetta er afar ánægjulegt og gerir okkur kleift að vinna að verkefninu að fullum krafti næstu misserin. Við erum þess fullviss að smáforritið LÍSA muni gerbreyta forsendum til íslenskunáms hjá innflytjendum.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
