Fulltrúar Akureyrarakademíunnar heimsóttu okkur um helgina og fengu kynningu á starfsemi Austurbrúar auk þess að fara í vettvangsferð á Seyðisfjörð. Akureyrarakademían er þverfaglegt rannsókna- og þekkingarsetur fólks sem er í háskólanámi og/eða vinnur að fræði- og ritstörfum, list- og nýsköpun.

Í haust mun fara fram málþing á þeirra vegum en þar á m.a. að skoða hvernig hægt væri að byggja upp samstarf við Austurland enda ótal tækifæri og samstarfsfletir sem hægt væri að nýta betur en nú er gert.

„Það var afskaplega ánægjulegt að kynnast starfsemi Akureyrarakademíunnar,“ segir Tinna Halldórsdóttir, yfirverkefnastjóri hjá Austurbrú. „Heimsóknin er vonandi upphaf að frekari samvinnu og samskiptum við sjálfstætt starfandi fræða- og listafólk að norðan. Ég held að það sé mikilvægt fyrir okkur öll að tengjast, deila þekkingu og vinna saman fremur en hvert í sínu horni.“