Systkinahljómsveitin Blood Harmony lýkur Sumartónleikaröð Bláu kirkjunnar árið 2023.
Sumartónleikaröð Bláu kirkjunnar endar annað kvöld
Tíminn líður hratt og á það ekki síst við á sumrin! Sumartónleikaröð Bláu kirkjunnar á Seyðisfirði rennur sitt skeið á enda þetta árið annað kvöld þegar svarfdælska systkinahljómsveitin Blood Harmony stígur á svið.
Blood Harmony er skipuð þeim Ösp, Erni og Björk Eldjárn. Þau flytja tónlist er flokka mætti sem bræðing af norrænni, keltneskri og bandarískri (Americana) þjóðlagatónlist. Hjómsveitin hefur gefið út nokkur lög sem sum hver hafa náð vinsældum í útvarpi en Blood Harmony hefur líka verið einkar dugleg við spilamennsku síðustu misserin og systkinin eru raunar nýkomin heim úr þriggja vikna tónleikaferðalagi um Bretland. Gestir Bláu kirkjunnar eiga því von á hljómsveit í fantaformi annað kvöld! Fyrir þá sem vilja kynna sér betur tónlist Blood Harmony þá má finna hana á helstu streymisveitum.
„Þetta eru síðustu tónleikar sumarsins á vegum Sumartónleikaraðar Bláu kirkjunnar og við viljum þakka öllum sem mættu, bæði flytjendum og gestum, og vonandi getum við lokið þessu með húsfylli annað kvöld,“ segir Sigurður Jónsson, stjórnarformaður Sumartónleikaraðar Bláu kirkjunnar. „Þá vil ég þakka Uppbyggingarsjóði Austurlands, Tónlistarsjóði Rannís, SVN og sveitarfélaginu Múlaþingi fyrir fjárstuðning. Það væri mjög erfitt að halda úti svona metnaðarfullri tónleikadagskrá ef ekki væri fyrir góða aðstoð.“
Auglýst eftir flytjendum næsta sumars
Sumartónleikaröðin á sér orðið nokkuð langa sögu en hún var sett á laggirnar árið 1998 af söngkonunni og tónlistarkennaranum Muff Worden sem kom frá Bandaríkjunum til að kenna við Tónlistarskólann á Seyðisfirði. Muff lést langt fyrir aldur fram árið 2006 en ákveðið var að halda tónleikahaldinu áfram í hennar minningu og ætíð bjóða upp á vandaða og fjölbreytta dagskrá.
Á næstu dögum munu skipuleggjendur auglýsa eftir flytjendum fyrir tónleikaröð næsta sumars og tónlistarfólk um allt land er hvatt til að sækja um.
Tónleikar Blood Harmony hefjast stundvíslega klukkan 20:30 en húsið opnar klukkan 20. Miðar seldir við hurð.
Nánari upplýsingar
Jón Knútur Ásmundsson
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
