Nýir landnemar útskrifaðir
Fyrir jól lauk Landnemaskólanum hjá Austurbrú en þetta er námsleið ætluð innflytjendum og flóttafólki. Fimmtán nemendur luku námi og gerðu þeir sér glaðan dag í tilefni námslokanna.
Markmið námsins er að veita innsýn og almenna fræðslu um íslenskt samfélag og gefa nemendum tækifæri til að ræða það sem brennur á þeim enda óhjákvæmilegt að ýmsar spurningar vakni þegar fólk þarf að aðlagast nýjum aðstæðum í nýju landi. Austurbrú kennir námsleiðina fyrir hönd Vinnumálastofnunar. Þátttakendurnir voru fimmtán talsins, öll flóttafólk frá Úkraínu og búsett á Austurlandi. Kennari var Iryna Boiko en hún var að kenna námsleiðina í annað sinn. Boðið var upp á tvær kennslulotur á Eiðum en fjarkennsla nýtt þess á milli.
Upplýsandi og gagnlegt
Marharyta Alieksieieva var einn nemenda. Hún flutti til Íslands frá Úkraínu eftir innrás Rússa í landið í byrjun árs 2022. „Ég er mjög þakklát Íslendingum að hafa tekið á móti okkur,“ segir hún. „Í dag bý ég á Reyðarfirði, hef verið í atvinnuleit sem er vonandi að fara skila árangri.“ Hún segir námið hafa verið bæði upplýsandi og gagnlegt. „Við vorum með mjög hæfan og góðan kennara,“ segir hún, „og það var margt mjög merkilegt sem kom fram. Mér finnst t.d. áhugavert að Íslendingum hafi tekist að skapa svona góð lífskilyrði í landinu þrátt fyrir erfitt veðurfar og um margt erfiðar aðstæður. Svo finnst mér líka mjög merkilegt að það skuli ekki vera nein munaðarleysingjahæli á Íslandi!“
Slúttað á Tehúsinu
Hún segir þetta nám mjög gagnlegt fyrir innflytendur og annað fólk sem hefur litla þekkingu á landi og þjóð. Marharyta segist ætla að halda áfram námi á nýja árinu og hefur hug á að skrá sig í íslenskukennslu hjá Austurbrú. Sem fyrr segir lauk námsleiðinni fyrir jól en lokadaginn, þann 2. desember, bauð Vök Baths nemendum til sín og svo var haldið í Sláturhúsið, menningarmiðstöð á Egilsstöðum, þar sem hópurinn skoðaði ljósmyndasýningu og svo var farið í næsta hús bókstaflega í súpu og brauð á Tehúsinu.
Þakkir
Austurbrú þakkar Vök Baths, Sláturhúsinu og Tehúsinu kærlega fyrir stuðninginn. Við viljum líka þakka starfsfólki Safnahúss Egilsstaða sem tók á móti hópnum fyrr í haust.
Nánari upplýsingar veitir:
Úrsúla Manda Ármannsdóttir
Neskaupstaður
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
