Framfaraspor fyrir austfirskt samfélag
„Uppbygging Egilsstaðaflugvallar er forsenda þess að á Austurlandi geti dafnað öflug og sjálfbær ferðaþjónusta allt árið um kring,“ segir Dagmar Ýr Stefánsdóttir, framkvæmdastjóri Austurbrúar.
Stutt við aukna dreifingu ferðamanna um landið allt
Menningar- og viðskiptaráðherra undirritaði í dag samning við Íslandsstofu um áframhaldandi stuðning við markaðssetningu á Akureyrarflugvelli og Egilsstaðaflugvelli. Verkefninu Nature Direct er ætlað að hvetja til frekara samstarfs og samvinnu Íslandsstofu, Isavia, Markaðsstofu Norðurlands og Austurbrúar um kynningu á flugvöllunum á Akureyri og Egilsstöðum fyrir beint millilandaflug á svæðinu.
Samningurinn er til tveggja ára og nemur árlegt framlag til hans 15 m.kr. Með honum fá Isavia innanlandsflugvellir og Íslandsstofa það hlutverk að kynna flugvellina sem og Flugþróunarsjóð, en sjóðurinn hefur það að markmiði að styðja við uppbyggingu nýrra flugleiða til Íslands þannig að koma megi á reglulegu millilandaflugi um alþjóðaflugvellina Akureyri og Egilsstaði.
„Eitt af forgangsmálum mínum sem ferðamálaráðherra er að stuðla að aukinni dreifingu ferðamanna um landið utan háannatíma. Það bætir rekstrarskilyrði í greininni með auknum fyrirsjáanleika og betri nýtingu innviða á ársgrundvelli. Skilvirkasta leiðin til þess er að ýta undir beint millilandaflug til alþjóðaflugvallanna á landsbyggðinni,“ er meðal þess sem Lilja Dögg Alfreðsdóttir, menningar- og viðskiptaráðherra, segir í fréttatilkynningu frá ráðuneytinu.
Eflir ferðaþjónustuna
„Uppbygging Egilsstaðaflugvallar er forsenda þess að á Austurlandi geti dafnað öflug og sjálfbær ferðaþjónusta allt árið um kring,“ segir Dagmar Ýr Stefánsdóttir, framkvæmdastjóri Austurbrúar. „Á síðustu árum hefur atvinnugreinin eflst til muna og landshlutinn hefur líkast til aldrei haft jafn mikið aðdráttarafl sem áfangastaður. En við eigum mikið inni og takist okkur að tryggja beint millilandaflug, til og frá Egilsstöðum, eru möguleikarnir á auknum vexti greinarinnar nær óþrjótandi með tilheyrandi atvinnusköpun, auknum gjaldeyristekjum og fjölgun íbúa. Við fögnum því þessu skrefi sem tekið er í dag og erum þakklát stjórnvöldum að sýna í verki vilja sinn að þau stefni að jafnari dreifingu ferðamanna yfir árið og um landið allt.“
Áhrifin mikil og víðtæk
Dagmar segir að Austfirðingar hafi lært margt á síðustu árum í tilraunum sínum til að koma á beinu millilandaflugi til og frá Egilsstöðum. „Í mínum huga er ljóst að með því að opna fleiri gáttir inn í landið mun landshlutinn verða spennandi kostur fyrir fjárfesta í ferðaþjónustu sem geta hjálpað okkur að nýta til fulls þær auðlindir sem búa í umhverfi, samfélagi og menningu Austurlands. Beint flug mun líka efla aðrar atvinnugreinar á Austurlandi sem nú þegar eru firnasterkar. Á það hefur t.d. verið bent að efling flugvallarins gæti gert austfirskum útflutningsfyrirtækjum mögulegt að margfalda útflutningsverðmæti sinna afurða,“ segir hún og bætir við:
„Ég lít því svo á að öll skref sem tekin eru í þá átt að efla Egilsstaðaflugvöll séu framfaraspor fyrir austfirskt samfélag og liður í því að þróa fjölbreyttara atvinnulíf. Það er hagsmunamál okkar allra að samfélagið leggi ekki öll sín egg í eina körfu og efling flugvallarins mun fjölga atvinnutækifærum og þar með auka búsetugæði og aðdráttarafl Austurlands fyrir nýja íbúa.“
Fréttatilkynningu menningar- og viðskiptaráðuneytis má lesa hér.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
