Staðan tekin á Stöðvarfirði
Íbúar á Stöðvarfirði hittust í gær í Balaborg, félagsheimili eldri borgara, og fóru yfir stöðuna á byggðaþróunarverkefninu Sterkur Stöðvarfjörður. Þetta var óformlegur fundur þar sem fólk fór yfir helstu markmið sem verið er að vinna að, forgangsröðun og fleira.
Það var Valborg Ösp Árnadóttir Warén, verkefnastjóri Sterks Stöðvarfjarðar, sem boðaði til fundarins en tuttugu og fimm Stöðfirðingar mættu. „Þetta er þriðji svona „miní“ íbúafundurinn sem ég held,“ segir Valborg. „Mér finnst oft nást betri umræður þegar verið er að fjalla um afmarkað efni. Tilgangurinn núna var að skerpa fókus, veita íbúum upplýsingar um vinnu síðustu mánaða og fá að heyra álit þeirra á stöðu verkefnisins.“
Helstu málin til umræðu voru t.d. ljósleiðaramál, uppbygging iðnaðareldhúss, tækifæri í ferðaþjónustu og orkustyrkir Orkustofnunnar. „Við fórum yfir þau starfsmarkmið sem eru merkt 2024 og forgangsröðun á þeim,“ segir hún. „Flest erum við sammála um að leggja áherslu á hvernig hægt sé að vekja meiri athygli á fornleifagreftinum inn á Stöð og enn meiri áherslu á að styrkja ferðaþjónustuna á staðnum. Við ræddum líka um að stofna hóp ferðaþjónustuaðila á Stöðvarfirði til að skerpa á verkefnunum þar.“
Hún segir að það sé samdóma álit íbúa að vonbrigði síðasta árs sé staða verslunar á Stöðvarfirði og mikill samhugur í fólki að leita allra leiða til að koma verslun í þorpið. Mikil umræða hafi skapast um hvað sé hægt að gera í þeim málum en það vanti fyrst og síðast húsnæði. Íbúar vilji að meiri kraftur verði settur í að kanna allar mögulegar leiðir til þess að koma upp verslun á Stöðvarfirði.
Valborg segist ánægð með fundinn og umræðurnar. „Já, þetta var vel heppnaður fundur og mætingin var góð. Fólk tók þátt og umræðurnar voru skemmtilegar. Það er alltaf gott að fá upprifjun á verkefnisáætluninni og minna íbúa á að verið sé að vinna eftir þeirra forgangsröðun og áhersluatriðum,“ segir Valborg, verkefnastjóri Sterks Stöðvarfjarðar.
Leitað lausna í samvinnu við heimamenn
Sterkur Stöðvarfjörður er hluti af byggðaverkefninu Brothættar byggðir sem hefur þann tilgang að stöðva viðvarandi fólksfækkun í smærri byggðarkjörnum og sveitum landsins. Það er unnið með því að fá fram skoðanir íbúanna sjálfra á framtíðarmöguleikum heimabyggðarinnar og leita lausna á þeirra forsendum í samvinnu við ríkisvaldið, landshlutasamtök, atvinnuþróunarfélag, sveitarfélagið, brottflutta íbúa og aðra. Verkefnið er samstarfsverkefni Austurbrúar, Byggðastofnunar og viðkomandi sveitarfélags. Eitt bæjarfélag á Austurlandi, Stöðvarfjörður, er nú þátttakandi í verkefninu en áður hefur Borgarfjörður eystri tekið þátt.
Nánar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
