Verkefnið ber yfirskriftina Upplifðu og er sannkölluð stafræn bylting þegar kemur að skipulagningu ferðalaga um Ísland og upplýsingagátt um það sem í boði er. Allar sex markaðsstofur landshlutanna; Markaðsstofa Norðurlands, Markaðsstofa Vestfjarða, Markaðsstofa Vesturlands, Austurbrú, Markaðsstofa Reykjaness og Markaðsstofa Suðurlands, standa að verkefninu.

Um ræðir gagnvirkt vefsvæði þar sem notendum gefst kostur á að sníða ferðalagið nákvæmlega eftir sínu höfði og sjá hvað er í boði á hverjum stað, fá nákvæma tímaáætlun milli áfangastaða og síðast en ekki síst, uppgötva nýja möguleika á myndrænan hátt.

María Hjálmarsdóttir, en hún og Jónína Brynjólfsdóttir verkefnastjórar hjá Austurbrú vinna með Tjarnargötunni og markaðsstofum landshlutanna að verkefninu, segir:

„Það er bylting í ferðaskipulagningu að þú getir sett fríið þitt upp á myndrænan hátt. Eins er þetta sérstaklega sniðugt fyrir barnafjölskyldur, að geta skoðað saman hvernig ferðin verður og eiga síðan minningar á myndbandi frá stöðunum sem heimsóttir voru.“

Upplifdu.is brýtur þannig blað í sögu upplýsingagjafar til ferðalanga um Ísland en ekki eru fordæmi fyrir viðlíka gagnvirkri síðu með jafn yfirgripsmiklar upplýsingar á fjölmörgum sviðum ferðaþjónustu á Íslandi. Þróun og framleiðsla er í höndum framleiðslustofunnar Tjarnargötunnar og er myndefnið sem prýðir síðuna unnið úr einum stærsta myndabanka sem gerður hefur verið úr efni frá Íslandi.

Síðan er einföld í notkun og miðar að því að sem flestir geti nýtt sér hana. Notendur velja sér upphafspunkt ferðalags og geta svo séð hvað er í boði á hverjum þeim stað sem heillar og handvelja hvað skuli heimsækja og hvaða afþreyingu og þjónustu skuli nýta meðan á heimsókn stendur. Hægt er að velja þar til gerðar síur til að auðvelda enn frekar skipulagningu ferðarinnar og eru þær síur þrjár; staðir, afþreying og þemu. Sían staðir nær til að mynda yfir kirkjur, fornminjar, útsýni, gil og gljúfur, jökla og hella. Afþreying inniheldur baðstaði, hvalaskoðun, matarupplifanir, hjólaferðir, golfvelli, dýragarða o.fl. Þemu endurspegla svo tegund ferðar; fjölskylduferð, ævintýraferð, söguslóðir, afslöppun, menningu, dýralíf eða náttúru.