Verkefnið er unnið undið merkjum Brothættra byggða og Austurbrú veitir því forstöðu. Um þriðjungur íbúa Borgarfjarðar sótti fundinn þar sem verkefnastjóri fór yfir stöðu verkefnisins sem hefur nú staðið yfir í tvö ár og íbúar fengu tækifæri til að endurskoða og bæta við markmiðum fyrir komandi ár. Ljóst er að mörg markmiða sem íbúar settu sér í upphafi verkefnisins árið 2018 hafa nú þegar náðst eða eru komin vel á veg. Þau eru til dæmis bætt heilbrigðisþjónusta í heimabyggð með ráðningu hjúkrunarfræðings, verslun, bættar samgöngur með klæðningu vega og betri fjarskipti með lagningu ljósleiðara. Að auki er bygging tveggja nýrra parhúsa hafin á Borgarfirði og þrjú ný fyrirtæki hafa hafið starfsemi eða flutt hana til fjarðarins.

Á fundinum voru styrkúthlutanir frumkvæðissjóðs Brothættra byggða kynntar. Samtals bárust 35 umsóknir og hlutu 15 verkefni styrk til fjölbreyttra verkefna. Má þar nefna þróun á náttúrubaði, vöruþróun á gini, sumarbúðir, uppbyggingu vegna hjólreiða, tækjakaup til harðfiskverkunar, uppsetningu ærslabelgs og uppbyggingu samfélagsmiðstöðvar í Fjarðarborg.

Nánari upplýsingar um úthlutunina má sjá á vef Borgarfjarðar eystri.