Verkefnin þrjú eru:

• Þjóðleikur (Menningarmiðstöð Fljótsdalshéraðs) – 4.600.000 kr.
• BRAS – Menningarhátíð barna og ungmenna á Íslandi (Austurbrú) – 3.000.000 kr.
• Lifandi fræðsla um náttúru og náttúrvernd, sögu og menningarminjar (Óbyggðasafn ehf í samstarfi við marga aðila á Austurlandi) – 2.000.000 kr.

Að auki er Sviðslistamiðstöð Austurlands í samstarfi í tveimur verkefnum sem hlutu styrk:

• Derringur – leikferð stýrt af Dansfélaginu Lúxus.
• Verðlauna hátíð ungra áhorfenda – stýrt af Kvikmyndamiðstöð Íslands.

Austurbrú hefur verið leiðandi í uppbyggingu barnamenningar á Austurlandi í góðu og miklu samstarfi við marga ólíka aðila í landshlutanum; sveitarfélög, fyrirtæki og stofnanir. Undanfarin tvö ár hefur BRAS verið áhersluverkefni Sóknaráætlunar Austurlands og áætlað er að halda hana í þriðja sinn í haust. Ljóst er að framundan eru metnaðarfullir og skemmtilegir viðburðir í barnamenningu á Austurlandi.

Síðustu ár hefur mikil áhersla verið lögð á menningu barna og ungmenna, m.a. með sérstakri aðgerðaráætlun mennta- og menningarráðuneytisins, og fjölbreytt verkefni hafa orðið til, s.s. KrakkaRúv, List fyrir alla, Barnamenningarhátíð í Reykjavík, Kópavogi og víðar, en nú síðast veitan List fyrir alla sem til varð í Covid-ástandinu.

Þjóðleikur hófst á Austurlandi, í samstarfi Þjóðleikhússins og Sviðslistamiðstöðvar Austurlands, og fer nú fram um allt land. BRAS er komið til að vera og mjög vel hefur gengið að efla þá hátíð og þátttaka bæði barna og ungmenna góð en nú eykst líka áhugi listamanna og stofnanna á því að taka þátt í hátíðinni.

Signý Ormarsdóttir, yfirverkefnastjóri menningar og skapandi greina hjá Austurbrú, er að vonum ánægð með styrkina en segir að enn séu mörg tækifæri til að bæta í. „Vonandi leiðir þessi þróun til þess að enn fleiri huga frekar að menningu og listum fyrir börn. Gaman væri að sjá meiri áherslur í pólistísku umhverfi á Austurland í þessa átt, bæði með bættu aðgengi barna að listmenntun og með því að skilyrða fjárveitingar til opinberra stofnana m.a. við áætlarnir um efni fyrir börn, líkt og Reykjavíkurborg gerir,“ segir Signý.

• Nánar um úthlutunina