Í mati dómnefndar segir að „samstarf austfirsku safnanna í verkefninu Austfirskt fullveldi – sjálfbært fullveldi, sé til fordæmisgefandi um hvernig söfn af hvaða stærðargráðu sem er geta gert sig gildandi í samfélagsumræðunni og verið leiðandi í samstarfi við fleiri stofnanir. Sýningin tók á knýjandi málefnum samtímans, tengdi safnkost við samfélagið þá, nú og í náinni framtíð með hliðsjón af heimsmarkmiðum Sameinuðu þjóðanna. Verkefnið er til fyrirmyndar og íslensku safnastarfi til framdráttar.“

Verkefnastjóri sýningarinnar var Elfa Hlín Pétursdóttir hjá Austurbrú. Hún kallaði aðilana sem unnu að sýningunni saman í upphafi.„Mikill áhugi var á að vinna að sýningu tengdri fullveldinu en enginn aðili treysti sér til að ráðast í það einn og óstuddur,” segir Elfa Hlín. „Niðurstaðan var því að sameina kraftana. Austurbrú gat þannig leitt alla þessa áhugasömu aðila saman og allir lögðu þeir mikið til verksins. Útkoman varð sýningin Austfirskt fullveldi sem fram fór á fjórum stöðum og sameinaðist að lokum á einum stað.”

Um Austfirskt fullveldi – sjálfbært fullveldi

Frumlegum aðferðum var beitt til að skoða og skapa umræðu um hugtökin fullveldi og sjálfbærni út frá aðstæðum barna þá og nú. Kjarninn var fjórskipt sýning, sem sett var upp á þessum söfnum og Gunnarsstofnun. Á hverjum stað voru tvö börn í forgrunni, annars vegar barn frá árinu 1918 og hins vegar barn af sama kyni og á sama aldri árið 2018. Aðstæðum þessara barna var lýst í fyrstu persónu frásögnum þar sem komið var inn á mismunandi málefni sem tengjast heimsmarkmiðum Sameinuðu þjóðanna um sjálfbæra þróun, s.s. fátækt, hungur, heilsu, menntun, jafnrétti, aðgang að vatni, sjálfbæra orku, atvinnumöguleika og nýsköpun. Sögurnar voru frumsamdar en byggðar á heimildum um aðstæður barna þá og nú. Frásagnirnar voru myndskreyttar með ljósmyndum, annars vegar af barni í nútímanum og hins vegar af þessu sama barni í „fortíðinni“. Til að ná fram einkennum gamalla ljósmynda var myndin af barninu í fortíðinni tekin með gömlum ljósmyndatækjum frá Eyjólfi Jónssyni ljósmyndara frá Seyðisfirði, sem varðveitt eru í Tækniminjasafni Austurlands. Jafnframt var opnuð heimasíða með fræðsluefni og margvíslegum fróðleik.