Sveitarfélögin kalla í sífellt meira mæli eftir miðlægum stuðningi við stafræna framþróun enda eru þau ekki komin eins langt á veg í stafrænni framþróun og sveitarfélög eru almennt í þeim löndum sem við berum okkur gjarnan saman við. Stefna Sambands íslenskra sveitarfélaga er að kynna fyrir sveitarfélögum forsendur fyrir stafrænni framþróun og tækifæri, kanna áhuga þeirra á stafrænu samstarfi, þarfir og væntingar þeirra til slíks samstarfs.

Fjóla María starfaði áður sem verkefnastjóri hjá Stafrænu Íslandi sem rekið er á vegum fjármála- og efnahagsráðuneytisins m.a. með það að markmiði að efla stafræna innviði, stuðla að auknum samrekstri hins opinbera og auka og efla þjónustu við almenning og fyrirtæki. Hún þekkir því vel til á þessu sviði og fjallaði í fyrirlestri sínum t.d. um stöðu ríkis og sveitarfélaga í stafrænni þróun, reynslu nágrannaþjóða okkar og hvað við getum lært af þeim. Fjóla María fjallaði einnig um breytingastjórnun og áhrif breytinga, aðferðafræði, forgangsröðun verkefna, áherslur og virðið fyrir samfélagið.

„Það var mjög ánægjulegt að eiga samtal við stjórnendur og starfsmenn sveitarfélaga á Austurlandi um hvað stafræn umbreyting þýðir,“ segir Fjóla María. „Við ræddum einnig hvaða áhrif framþróunin getur haft á fólk og samfélagið, hvað Danir hafa verið að gera og tækifærin sem framundan eru. Stafræn umbreyting snertir ekki bara tækni, hún snertir ferlin sem skilgreind eru innan starfseininga, fólkið og menninguna sem keyrir áfram árangurinn. Stafræn umbreyting fylgir í raun hefðbundnu breytingastjórnunarferli og því er mikilvægt að stjórnendur sveitarfélaga hugsi um hana heildrænt.“

Fyrirlesturinn var vel sóttur og meðfylgjandi myndir sýna m.a. þátttakendur leysa hina þekktu spaghetti- og sykurpúðaþraut sem reynir t.d. á samskiptafærni, skipulag og samstarf.