Aðalfundur Sambands sveitarfélaga á Austurlandi (SSA) og ársfundur Austurbrúar ses. fóru fram á Fáskrúðsfirði 20. mars 2026, þar sem farið var yfir starfsemi liðins árs, fjárhagsstöðu og helstu áherslur fyrir komandi ár.

Á aðalfundi SSA var rifjað upp að árið 2026 markar 60 ára afmæli sambandsins. Í skýrslu stjórnar sem formaður stjórnar SSA, Berglind Harpa Svavarsdóttir, flutti kom fram að SSA gegnir áfram lykilhlutverki í að standa vörð um sameiginlega hagsmuni Austurlands og vinna að auknum jöfnuði til búsetu milli landshluta. Áherslur síðasta árs hafa einkum snúið að samgöngum og uppbyggingu innviða, auk vinnu við tekjustofna sveitarfélaga og endurskoðun samþykkta sambandsins.

Á fundinum voru ársreikningar SSA og Austurbrúar lagðir fram og samþykktir, auk þess sem kynntar voru fjárhagsáætlanir fyrir komandi ár.

Töluverð umræða varð um tillögur að breytingum á samþykktum SSA, þar sem þrjár tillögur lágu fyrir sem snertu skipan stjórnar og atkvæðavægi sveitarfélaga. Að lokinni umræðu var ein tillaga stjórnar samþykkt með meirihluta atkvæða.

Ársfundur Austurbrúar fór fram samhliða og þar var farið yfir víðtæka starfsemi stofnunarinnar. Lögð var áhersla á hlutverk Austurbrúar sem tengiliðar milli sveitarfélaga, ríkisins og annarra hagaðila, auk þess sem farið var yfir fjölbreytt verkefni á sviði atvinnuþróunar, menntunar, nýsköpunar, menningar og byggðaþróunar.

Sérstaklega var vikið að efnahagsgreiningu Austurlands sem unnin var í samstarfi við ráðgjafafyrirtækið Analytica og hefur styrkt málflutning landshlutans um aukna fjárfestingu í innviðum. Þá voru kynntar áherslur fyrir árið 2026, meðal annars áframhaldandi vinna við Sóknaráætlun Austurlands, efling nýsköpunar og menntunar, sem og verkefni tengd umhverfismálum og samfélagsþróun.

Í lok fundar voru færðar sérstakar þakkir til Skúla Björns Gunnarssonar fyrir störf hans í þágu Austurbrúar, en hann hefur komið að starfsemi stofnunarinnar frá upphafi og gegnt lykilhlutverki í þróun hennar.

Fundirnir endurspegluðu mikilvægi samvinnu sveitarfélaga og stoðkerfis atvinnu- og samfélagsþróunar á Austurlandi, þar sem áfram er unnið að því að efla svæðið sem öflugt og samkeppnishæft samfélag til framtíðar.

Sjá ársrit Austurbrúar og SSA fyrir árið 2025.