Sunnudaginn 6. desember kl. 15-17 opnar lista- og handverkssýning á efri hæð Sláturhússins þar sem sýndur verður afrakstur námskeiða og listasmiðja sem haldnar hafa verið í vetur í Geðræktarmiðstöðinni Ásheimum. Nemendur í samtímalistum í ME taka einnig þátt í sýningunni auk handverksfólks úr Stólpa og Ásheimum.
Námskeiðið sem haldið var í haust var hugsað sem einskonar þakklæti til náttúrunnar. Unnið var með teikningu og málun með akrýllitum, vatnslitum og klippimyndum úr dagblöðum og auglýsingabæklingum sem berast okkur daglega en enda yfirleitt í ruslinu. Sóttur var efniviður og hráefni í umhverfið sem umlykur okkur og fjölbreyttum aðferðum beitt við listsköpunina.
Sýningin stendur frá 6.-12. desember og er opin á opnunartíma hússins frá 11 til 16 virka daga og á laugardögum frá 13 til 16. Fallegt jólaskraut og handverk verður til sölu á opnuninni. Vegna fjöldatakmarkana verður bara hægt að hleypa 9 einstaklingum inn í einu en settir verða upp gashitarar og boðið upp á heitan drykk fyrir utan Sláturhúsið fyrir þá sem komast ekki inn strax.
Leiðbeinandi og sýningarstjóri er Ólöf Björk Bragadóttir, myndlistarmaður og listakennari í ME. Hún hefur haldið tvö námskeið í vetur fyrir fólk með fötlun: Mósaíknámskeið og fyrrnefnt myndlistarnámskeið.
Námskeiðin voru samstarfsverkefni Austurbrúar og Fjölmenntar en Austurbrú hefur um árabil haft umsjón með námskeiðum fyrir fólk með fötlun á Austurlandi. Fjármögnun kemur frá Fjölmennt, símenntunar- og þekkingarmiðstöð, sem jafnframt sinnir ráðgjöf og stuðningi við fræðslustofnanir vegna náms og símenntunar fyrir fatlað fólk á Íslandi. Haldin eru nokkur námskeið á ári hverju og mikil áhersla lögð á að bjóða bæði upp á námskeið í handverki og önnur sem stuðla að hreyfingu og útivist.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn