Aðsókn í Hæfnihringi – stuðning fyrir konur í fyrirtækjarekstri á landsbyggðinni, hefur farið fram úr björtustu vonum en nú hafa rúmlega fjörutíu konur skráð sig og munu hefja leik innan skamms í sex hópum. Verkefnið var sett upp sem samstarfsverkefni milli atvinnuþróunarfélaga og landshlutasamtaka síðastliðið haust.
Verkefnið er samstarfsverkefni Samtaka sveitarfélaga á Norðurlandi vestra, Samtaka sveitarfélaga á Vesturlandi, Vestfjarðarstofu, Samtaka sveitarfélaga á Norðurlandi eystra, Austurbrúar, Samtaka sveitarfélaga á Suðurlandi og Samtaka sveitarfélaga á Suðurnesjum/atvinnuþróunarfélagsins Heklunnar.
Hæfnihringirnir fara fram í gegnum fjarfundarbúnað sem auðveldar konum af öllu landinu til að taka þátt. Fundirnir verða 6 talsins í þessari umferð þar sem tæpt verður á þeim helstu áskorunum sem konurnar eru að glíma við, svo sem markaðssetning á samfélagsmiðlum og tímastjórnun. Í Hæfnihringjunum fá konurnar tækifæri til að tengjast öðrum konum í svipuðum sporum víðs vegar um landið, mynda tengslanet, deila sín á milli og fá ráð hjá öðrum. Auk þess verða leiðbeinendur hringjanna með viðeigandi fræðslu sem miðuð er út frá þeim áskorunum sem hver hópur á sameiginlegt að standa frammi fyrir. Hæfnihringirnir eru fjármagnaðir af samstarfsaðilunum og stendur því konunum til boða endurgjaldslaust.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn