Háskólinn á Bifröst býður upp á nám fyrir stjórnendur og rekstraraðila í ferðaþjónustu. Kennt er í fjarnámi yfir 9 vikna tímabil og eru vinnulotur á Austurlandi ásamt lokahelgi á Bifröst.

Markmið námsins er að auka hæfni og þekkingu ferðaþjónustuaðila til að móta framtíðarsýn og takast á við ögrandi starfsumhverfi.  Námið miðar einnig að því að auka samvinnu ferðaþjónustuaðila. Kennsla fer svo fram í fjarnámi og geta þátttakendur hlustað á fyrirlestra á netinu og unnið verkefni hvenær sem þeim hentar. Náminu lýkur með  vinnuhelgi og formlegri útskrift.

Námskeið í Stjórnun og samvinna í ferðaþjónustu eru:
•    Markaðssetning og sala
•    Mannauðs- og þjónustustjórnun
•    Stefnumótun og gæðastjórnun

Fjarnám
Fjarnám hentar fólki sem búsett er um allt land. Skipulag fjarnámsins og öflugur fjarnámsbúnaður gerir nemendum kleift að stunda fjarnám hvar sem er. Fyrirlestrar og kennsluefni í hverju námskeiði er aðgengilegt nemendum á fjarnámsvef háskólans og nemendur geta þannig skipulagt tíma sinn eins og þeim hentar best. Vinnuhelgar eru mikilvægur þáttur í fjarnáminu á Bifröst. Þær eru notaðar til fyrirlestra, verkefnavinnu og samskiptaþjálfunar.  Vinnuhelgarnar standa frá kl. 13 á föstudögum til kl. 16 á laugardögum. Gera má ráð fyrir að nemendur þurfi að verja u.þ.b. 10 klst. á viku í fjarnámið við að hlusta á fyrirlestra og leysa verkefni.

Nánari upplýsingar veita Magnús Smári Snorrason forstöðumaður símenntunar á Bifröst  [email protected]  og í síma 433-3015 eða Bergþóra Arnórsdóttir fulltrúi símenntunar hjá Austurbrú [email protected] og í síma 4703800.