Í maí lauk fyrsta áfanga í verkefninu ,,Fossar á austursvæði Vatnajökulsþjóðgarðs“. Markmið verkefnisins er að finna og staðsetja minna þekkta fossa og flúðir á Austursvæði Vatnajökulsþjóðgarðs, skrifa örstutta lýsingu á hverjum og taka ljósmynd. Verkefnið er styrkt af „Vinum Vatnajökuls“, unnið af Guðrúnu Á. Jónsdóttur, starfsmanni Austurbrúar, og Kristín Ágústsdóttir sá um kortavinnslu og gerð vefsvæðis. 

„Töluverðar upplýsingar liggja fyrir í eldri skýrslum um fossa á þeim svæðum sem tengjast áhrifasvæðum virkjunnar við Kárahnjúka,“ segir Guðrún en verkefnið er unnið að hennar frumkvæði. „En þeir eru flestir utan marka Vatnajökulsþjóðgarðs eins og þau eru nú skilgreind. Vitað var að einhverjir fossar væru í ám og lækjum innan þjóðgarðsmarka á austursvæði en þeir hafa ekki hlotið eins mikla athygli og eru misvel þekktir. Með þessu verkefni erum við að auka grunnþekkingu á þjóðgarðinum sem mun vonandi nýtast við gerð fræðsluefnis í framtíðinni,“ útskýrir hún.

Rannsóknin fór fram í fyrrasumar í blíðskaparveðri. „Ég bjó í Snæfellsskála í nokkra daga,“ segir Guðrún. „Vinnudagurinn fólgst í því að ganga og hlaupa eftir ár- og lækjarfarvegum og finna fossa og flúðir. Ég notaðist við loftmyndir og reyndi að sjá á þeim hvar væru hugsanlegir staðir óþekktra og ónefndra fossa og síðan fór ég út að leita.“ Hún segir að sem náttúrufræðingur sé varla hægt að fá skemmtilegra verkefni. „Ég man að þegar ég var lítil var þetta það sem mig langaði til að gera þegar ég yrði stór. Þetta var svona gamladags náttúrufræðirannsókn, vera á vettvangi og haga sér svolítið eins og landkönnuður.“

Afraksturinn af fyrsta áfanga verkefnisins birtist í skýrslu og á vefsvæðinu: http://bit.ly/1nEjtUy. Áætlað er að skoða fleiri ár- og lækjarfarvegi á svæðinu sumarið 2014 og bæta við fossum og flúðum eftir því sem fleiri slíkir finnast.