Viltu hefja nám að nýju? Þá gæti námsleiðin Menntastoðir verið fyrir þig. Hún er hugsuð fyrir fólk sem ekki hefur lokið stúdentsprófi, eða bóklegu námi iðngreina. Boðið verður upp á Menntastoðir í fjarnámi.

Þetta er í fyrsta skipti sem boðið er upp á þessa námsleið hér fyrir austan en námið er 440 klukkustundur og kennd eru öll helstu grunnfög framhaldsskólanna. 

Haraldur Geir Eðvaldsson mun hafa umsjón með henni fyrir hönd Austurbrúar. „Menntastoðir er námsleið fyrir fullorðið fólk sem vill hefja nám að nýju, hvort sem um er að ræða stúdentspróf eða nám í kjölfar raunfærnimats,“ útskýrir hann. 

Hann segir ætlunina að bjóða upp á námið sem fjarnám og því ætti staðsetning nemenda að skipta litlu máli. Það kallar á að nemendur hafi aðgang að tölvu og vinni flest öll sín verkefni inn á netsvæði. „Kennarar verða í mjög góðu sambandi við nemendur og stefnan er að nemendur geti fengið jafn góða, og vonandi betri, þjónustu heldur en ef námið væri staðnám,“ segir Haraldur.

Menntastoðir byrja á haustdögum fáist næg þátttaka. Allir sem hafa áhuga á að kynna sér námsleiðina eru beðnir um að koma sér í samband við Harald og/eða Bergþóru Hlín Arnórsdóttur í síma 470 3800 eða í gegnum tölvupóst: haraldur (hjá) austurbru.is

Með því að smella hér má skoða kynningarmyndband um Menntastoðir.