Menntastoðir heitir námsleið sem Austurbrú hefur verið með í haust en hún er m.a. ætluð þeim sem eru að hefja nám eftir hlé. Nú er liðinn rúmur mánuður síðan námið hófst og við ákváðum að slá á þráðinn til eins nemanda sem var að hefja nám að nýju.

Rúnar Gunnarsson hætti í námi sextán ára gamall og hafði verið að hugsa um það í nokkurn tíma að taka upp þráðinn. „Ég lofaði mömmu að fríið yrði bara í eitt ár en síðan liðu tuttugu og sjö ár,“ segir Rúnar en hann var búinn að skoða nám hjá Keili og fjarnám ýmis konar þegar hann sá auglýsingu frá Austurbrú um Menntastoðir. „Ég hafði samband við Austurbrú og átti gott spjall við Harald [Geir Eðvaldsson] sem hefur umsjón með námsleiðinni, fékk öll svör sem ég þurfti og ákvað í framhaldinu að slá til.“

Hann segist hafa verið svolítið stressaður enda langt liðið frá því að hann sat síðast á skólabekk. „Ég var eins og krakki að fara í skóla í fyrsta skipti – með hnút í maganum,“ segir Rúnar um fyrstu staðlotuna. „En mér leið vel þegar hún var búin og þetta hefur gengið vonum framar.“

Námið fer allt fram í gegnum tölvur og hægt er að stunda það hvar og hvenær sem er. Rúnar býr á Seyðisfirði og er í fullri vinnu sem fiskverkamaður hjá Brimbergi. Hann segir það ekki hafa reynst sér erfitt þótt hann sjái samnemendur sína sjaldan og tæknileg vandamál komi ekki oft upp. „Ég er búinn að umgangast tölvur mikið og bróðir minn er kerfisfræðingur. Hann hjálpar til lendi ég í vandræðum.“

Menntastoðum lýkur í vor og Rúnar er strax farinn að velta fyrir sér framhaldinu. „Ég er svona að skoða möguleikana,“ segir hann. „Gangi allt að óskum gæti verið að ég prófaði að fara í háskólabrúnna hjá Keili.“