Um miðjan september var Austurbrú boðið að senda fulltrúa á fund í Grænlandi sem haldinn var á vegum NORDREGIO. Fundurinn fór fram í Qaqortoq og var aðalumræðuefnið uppbygging iðnaðar í fámennum samfélögum og fjallað í því samhengi um fyrirhugaða námuvinnslu á Grænlandi.

Þátttakendur voru frá öllum Norðurlöndunum og fór Kjartan Glúmur Kjartansson, verkefnastjóri, sem fulltrúi Austurbrúar. Hann sagði frá stóriðjuskólanum, sem er langtíma fræðsluverkefni á vegum Austurbrúar og Fjarðaáls. Fulltrúar frá fyrirtækinu Launafli á Reyðarfirði voru einnig á fundinum og sögðu frá reynslu sinni varðandi uppbyggingu fyrirtækisins á síðustu árum.

Glúmur segir að mikið hafi verið rætt um menntun í tengslum við uppbyggingu orkufreks iðnaðar og þau vandamál sem geta skapast þar sem mjög fjölmennir vinnustaðir koma inn í lítil samfélög. „Sérstaklega var mönnum tíðrætt um óvissu sem fylgir oft svona stórum framkvæmdum,“ segir Glúmur. „Hvað gerist ef arðsemisútreikningar koma ekki vel út og ekkert verður úr neinu? Það gengur illa að fá nemendur til að sérhæfa sig í iðngreinum ef óvissan um atvinnu að loknu námi er mikil og vandamálið verður svo enn flóknara ef stór verkefni fara í gang og flytja þarf inn allt sérhæft starfsfólk,“ segir Glúmur ennfremur og bætir við að fundurinn hafi verið mjög áhugaverður. Það hafi verið ánægjulegt að fá að deila reynslu og heyra af reynslu annara.