Frumkvöðlasetrið Djúpið opnar í dag. Tilgangur setursins er að styðja frumkvöðla við að skapa ný atvinnutækifæri á Djúpavogi og víðar í landshlutanum.

Í vor undirrituðu Austurbrú ses., Afl starfsgreinafélag og Djúpavogshreppur viljayfirlýsingu um stofnun frumkvöðlaseturs á Djúpavogi. Tilgangur setursins er að styðja frumkvöðla við að hrinda hugmyndum sínum í framkvæmd og skapa ný atvinnutækifæri á Djúpavogi og víðar í landshlutanum.

AFL Starfsgreinafélag leggur setrinu til að byrja með húsnæði í Sambúð, Mörkinni 12 á Djúpavogi auk aðgangs að netttengingu. Djúpavogshreppur leggur frumkvöðlasetrinu til 250.000 kr. til að standa straum af nauðsynlegum stofnkostnaði. Austurbrú ses. veitir Djúpinu samræmda og þverfaglega þjónustu tengda atvinnulífi, menntun og menningu.

Efnt var til nafnasamkeppni í haust til þess að finna frumkvöðlasetrinu nafn. Alls bárust 33 tillögur að nafni og varð nafnið Djúpið fyrir valinu. Djúpið er hafsjór hugmynda og er nafnið tákn þess dýpis sem hver og einn frumkvöðull sækir í sinn reynslubrunn.

Sköpunarkjarkur í Djúpinu

Í dag, 3. nóvember, verður boðið upp á námskeiðið Sköpunarkjarkur, í Djúpinu. Námskeiðið er kjörið fyrir hvern þann sem telur að hann hafi ekki nýtt sér til fulls sköpunarkraft sinn og vill læra einföld verkfæri sem nýtast í daglegustarfi. Kennt verður á tæki og tól til þess að finna skapandi lausnir. Námskeiðið er lauslega byggt á bókinni Sköpunarkjarkur (e. Creative Confidence) eftir bræðurna Tom og David Kelly. Kennari námskeiðsins er Karl Guðmundsson ráðgjafi í vöruþróun og markaðsmálum. Karl hefur starfað síðastliðin 15 ár í vöruþróun í heilbrigðistækni hjá Össuri, eigin fyrirtæki og sprotafyrirtækjum í Bandaríkjunum.

Í kjölfar námskeiðsins, kl. 20:00 verður formleg opnun á Djúpinu. Kökur og kaffi á könnunni og sköpunargleðin í loftinu. Allir velkomnir!

Nánari upplýsingar veitir Alfa Freysdóttir, verkefnastjóri Djúpsins, í síma 894 8228 og í netfanginu [email protected]