Eftirfarandi yfirlýsing vegna lokunar Upplýsingamiðstöðvar Austurlands var send á ferðaþjónustuaðila á Austurlandi sem og á ferðamálafulltrúa sveitarfélaga fyrr í dag. 

„Til þeirra er málið varðar,

Fyrst viljum við koma því á framfæri að við erum mjög hrygg yfir þeirri stöðu sem upp er komin með Upplýsingamiðstöð Austurlands. Sú ákvörðun stjórnar að loka var ekki léttvæg.

Mikilvægt er að umræðan sé upplýst og til þess fallin að hægt sé að leysa vandann sem er tvíþættur.

Annars vegar getur Austurbrú ekki haldið Upplýsingamiðstöðinni opinni það sem eftir lifir ársins 2014 sökum þess að fjármagn skortir til að halda úti opnun. Árið 2013 skilaði talsverðu tapi og var því ljóst í upphafi árs 2014 að í óefni stefndi.

Hins vegar þarf Austurbrú að endurskoða verkefnið í heild sinni; fjármögnun, starfsemi og opnunartíma fyrir árið 2015. Það þarf að gera í samstarfi við annars vegar Ferðamálastofu og ráðherra ferðamála með því að skoða markmið, tilgang, rekstur og fjármögnun landshlutamiðstöðva um landið allt. Hins vegar þarf að skoða verkefnið með Fljótsdalshéraði sem einnig hefur komið að verkefninu.

Samningur við Ferðamálastofu um rekstur landshlutamiðstöðvar

Austurbrú er með samning við Ferðamálastofu um annars vegar markaðstarf innan landshlutans og hins vegar rekstur landshlutamiðstöðvar, bæði verkefni eru með skilgreinda lýsingu. Slíkir samningar eru eins fyrir alla landshluta og hver landshluti fær sömu fjárhæð fyrir hvort verkefni um sig. Í öðrum landshlutum hefur rekstri landshlutamiðstöðvar verið komið í mismunandi farveg; Austurland, Vesturland og Höfuðborgarstofa reka saman markaðsstofu og landshlutamiðstöð. Rekstur markaðsmála og landshlutamiðstöðva er algjörlega aðskilinn á Norður- og Suðurlandi og Vestfjörðum. Á Reykjanesi býður markaðsstofan rekstur landshlutamiðstöðvar út til starfandi upplýsingamiðstöðva.

Rekstrarform Upplýsingamiðstöðvar Austurlands

Reksturinn er styrktur af Ferðamálastofu og Fljótsdalshéraði, aðrar tekjur eru af sölu bóka, korta og minjagripa. Tekjumöguleikar eru takmarkaðir vegna þeirra reglna sem gilda um rekstur landshlutamiðstöðva, sjá skilgreiningar hér að neðan.

Rekstur markaðsstarfs og þjónustusamningar

Rekstur markaðsstarfs í landshlutanum byggir á samningi við Ferðamálastofu, sveitarfélög og þjónustusamningum við fyrirtæki.

Markaðsstarfið snýr að td. heimasíðunni east.is, útgáfu á smábókinni, kortinu, kaupum á auglýsingum og kynningum í tímaritum, á netinu og á ferðasýningum.

Markaðsstarfið hefur það meðal annars að markmiði að markaðssetja og kynna Austurland sem áfangastað, halda úti öflugri heimasíðu, útgáfu og dreifingu bæklinga, þátttaka í sýningum og öðru markaðsstarfi innanlands og utan í samstarfi við lykilaðila, stjórnun og markaðssetning sameiginlegra viðburða, samræma markaðsstarf í ferðaþjónustu á Austurlandi m.a. með liðsinni og ráðgjöf við ferðaþjónustuaðila og sveitarfélög á svæðinu.

Skilgreiningar samkvæmt lögum

Í lögum um skipan ferðamála nr. 73/2005 kemur fram í 2. kafla, orðskýringar:
7. gr. Í lögum þessum er merking eftirfarandi hugtaka sem hér segir:
7.4. Upplýsingamiðstöð merkir í lögum þessum aðili sem stundar hlutlausa upplýsingagjöf til almennings. Upplýsingamiðstöð hvorki setur saman, býður til sölu né auglýsir ferðir eða aðra ferðatengda starfsemi.

Samningur Ferðamálastofu og Austurbrúar ses., verkefni upplýsingamiðstöðvar

Í samningi Ferðamálastofu og Austurbrúar kemur meðal annars fram:

1. Að annast almennt upplýsingastarf á sviði ferðamála og veita ferða- og heimamönnum þá bestu þjónustu sem framast er kostur hverju sinni.
2. Að hafa allar upplýsingar um þjónustu á svæðinu og svæðið sjálft sem aðgengilegastar.
3. Að svara almennum fyrirspurnum um landið í heild og viðkomandi svæði eða vísa fyrirspurnum til réttra aðila.
4. Að taka til sín bæklinga og dreifa til annarra upplýsingamiðstöðva og vera öðrum upplýsingamiðstöðvum á       svæðinu til stuðnings hvað varðar gögn, upplýsingagjöf og þjálfun starfsfólks.
5. Að gefa ferðaþjónustufyrirtækjum og klösum kost á að kynna starfsemi sína í húsnæði upplýsingamiðstöðvarinnar í þar til gerðum bæklingarekkum. Gæta ber þess að mismuna ekki ferðaþjónustu-aðilum með aðstöðu til að kynna þjónustu sína.
6. Að skrá upplýsingar um þá sem til upplýsingamiðstöðvarinnar leita.
7. Opnunartími er skilgreindur eftirfarandi: Opnun sé að lágmarki: Í maí og september 4 tímar, júní-ágúst 8 tímar á dag.

Við vonum að þetta sé ykkur til upplýsingar og hvetjum ykkur til að mæta á fund Ferðamálasamtaka Austurlands sem boðaður hefur verið kl 17.00 í dag á Icelandair Hótel Héraði.

Kær kveðja, 

Jóna Árný Þórðardóttir, framkvæmdastjóri Austurbrúar.“