Nýtt og áhugavert verkefni á vegum Austurbrúar hefur fengið úthlutað styrk frá norræna verkefnasjóðnum Nordplus. Verkefnið snýst um að þróa tungumálanám fyrir heilbrigðisstarfsfólk sem vill vinna í Skandínavíu og verður styrkurinn nýttur í undirbúningsheimsókn til frekari þróunar á hugmyndinni. 

Verkefnið er þróað hjá starfsfólki Austurbrúar í samvinnu við samstarfsaðila í Danmörku og Noregi. Hugmyndin á bak við verkefnið er að þróa tungumálanám fyrir heilbrigðisstarfsfólk búsett á jaðarsvæðum eins og á Austurlandi. Markmið námsins er að auka og bæta þekkingu starfsfólks í viðkomandi tungumálum á málefnum sem tengjast heilbrigðisgeiranum og það er ætlað fólki sem vill fara erlendis í tímabundna afleysingarvinnu eða í fasta vinnu.

Námskeiðið mun alfarið fara fram í gegnum tölvu þ.e. allt námsefni verður aðgengilegt á netinu og samskipti milli kennara og nemenda munu einnig fara fram á netinu. Með þessari kennsluaðferð geta allir tekið þátt í náminu óháð búsetu. Þessa kennsluaðferð hefur Austurbrú notað áður t.d. í námsleiðinni Menntastoðum. Í verkefninu er fólgin talsverð nýsköpun því þetta er í fyrsta skipti sem Austurbrú býður upp á tungumálakennslu fyrir mjög afmarkaðan hóp með skýr markmið þ.e. að læra hugtök og notkun þeirra á afmörkuðu sviði. „Fyrst verður verkefnið prófað á minni hóp sem einskonar „pilotprojekt,“ segir Else Möller, verkefnistjóri hjá Austurbrú. „Ef námskeiðið fær góðar móttökur hjá tilraunahópnum verður verkefnið boðið út bæði hér á Íslandi og erlendis og draumurinn er að þróa þetta námskeiðsform yfir á önnur verkefnissvið þar sem þörf er fyrir margvíslegt en um leið afmarkað námsefni.“

Verkefnið hefur fengið styrk frá NordPlus upp á 2320 evrur sem fer í undirbúningsheimsókn til samstarfsaðila í Kaupmannahöfn í janúar 2015 en Else segir að næsti áfangi í verkefninu sé að sækja um stærri styrk seinna í vetur til að þróa verkefnið áfram.

Nánari upplýsingar veitir Else Möller, verkefnastjóri hjá Austurbrú, í síma 867 0527.