Meistari Megas hefur verið umtalaður, umdeildur og jafnvel úthrópaður síðan hann kom fram á sjónarsviðið í kringum 1970. Kjartan Glúmur Kjartansson ætlar að segja frá uppvexti hans og list á námskeiði sem hefst 24. nóvember.

En hver er þessi maður sem hefur verið verðlaunaður fyrir íslenskt mál, sumum til gleði en öðrum til skelfingar? Úr hvaða umhverfi kemur Megas og hvert er framlag hans til íslenskrar menningar? Þessum spurningum hyggst Glúmur svara á námskeiðinu en í lýsingu þess segir að námskeiðið sé ætlað öllum sem vilja kynna sér verk Megasar hvort sem þeir hafa fylgst með honum í gegnum tíðina eða vilja kynna sér verk hans betur.

Á námskeiðinu verður fjallað um uppvaxtarár skáldsins í Reykjavík um miðja 20. öld og farið í gegnum tónlistarferilinn frá upphafi og fram á þennan dag. Þátttakendur skoða texta til dæmis hvað varðar náttúru, borg, stórmenni og ómenni. Einnig verður form og myndmál textanna í brennidepli.

Glúmur hefur hlustað á Megas frá táningsaldri og segir sitt eftirlætis lag vera „Þú bíður allavega eftir mér“ sem hann segir fallegt lag og frábæra lýsingu á Hallormsstaðaskógi. Hann fer leikandi með þessar línur án þess að líta í bók:

„Ég kom í Hallormsstað þarsem angan engu líka, ég ætlaði mér að þefa uppi en fann þar ekki nokkra slíka. Einungis þýskar kengúrur, kynjadýr. Já og kjarr tuttugumetra hátt, dreifbýlissjoppu og gaddavír,“ sönglar Glúmur og bætir því við að Megas sé vanmetið tónskáld og lögin hans falli iðulega í skuggann af textunum. Hann mun því spila talsvert af tónlist fyrir þátttakendur auk þess sem hann rýnir í textana.

Kennt verður frá klukkan 20:00-22:00 eitt kvöld í viku og dreifist námskeiðið á fjórar vikur. Frekari upplýsingar er að finna hér.