Um þrjátíu manns mættu á erindi Þorgerðar Katrínar Gunnarsdóttur frá Samtökum atvinnulífsins á miðvikudaginn í síðustu viku sem haldið var í fyrirlestrarsal Menntaskólans á Egilsstöðum. Erindið var liður í sóknaráætlunarverkefninu “Fjölgun námstækifæra í skapandi greinum á Austurlandi” sem Austurbrú hefur umsjón með í samvinnu við framhaldsskólana í fjórðungnum.

Í erindinu fór Þorgerður yfir stöðuna í íslensku skólakerfi en inntakið í fyrirlestrinum voru hugleiðingar um hvernig hægt sé að ýta undir list- og verkgreinar, hvort samtal eigi sér stað milli atvinnulífs og skóla, hvort einhver hagur sé af list-, verk- og starfsnámi fyrir atvinnulífið og hvort við séum föst í aldagamalli og kerfisbundinni skólahugsun þegar kemur að uppbyggingu náms í skapandi greinum.

Hvorki skóli né atvinnulíf fundið taktinn

Þorgerður talaði um að við þyrftum að hafa kjark til að breyta en mikið er búið að tala á hátíðastundum um eflingu list- og verknáms en lítið hefur breyst. Hvorki skólakerfið né atvinnulífið hafi fundið rétta taktinn í sínu samtali og segist hún hafa orðið vör við það viðhorf í sínu starfi að ekki sé æskilegt að atvinnulífið hafi skoðun á skólakerfinu.

Hún sagði að rúm sautján prósent fari í verknám en sóknarfæri liggi í þeim hluta nemenda sem fara í bóknám en vilja taka áfanga í verknámi. Þessi hluti sé um sextíu prósent allra framhaldsskólanema á landinu. Kannanir sýni að tæplega fjörutíu prósent þeirra sem fari í bóknám hefðu frekar vilja fara í verknám en ýmsir áhrifavaldar verða til þess að þeir velji bóknámið t.d. foreldrar, vinir, laun og ímynd námsins. Þó sé margt sem hafi áunnist síðustu ár og báðir aðilar þ.e. skóli og atvinnulíf séu að verða móttækilegri fyrir samstarfi.

Hún nefndi lykilþætti sem myndu breyta miklu fyrir eflingu náms almennt t.d. betra læsi og lesskilningur, tölvulæsi og tilfinningalæsi. Kennaramenntunina taldi hún of fastmótaða og að frekari endurgjöf vantaði frá atvinnulífinu. Einnig talaði hún um mikilvægi raunfærnimats og möguleikana sem fælust í því að meta þekkingu og reynslu fólks sama hvaðan hún kæmi.

Samstarf list- og verkgreina ákjósanlegt

Þorgerður sagði tækifæri liggja í þverfaglegri nálgun, nýjum leiðum og samstarfi milli list- og verkgreina. Þá taldi hún mikilvægt að innleiða hönnunarhugsun í atvinnulífið og þá samhliða í námið þar sem það á við. Gildi slíks fyrir íslenskt atvinnulíf væri ótvírætt. Nefndi hún fyrirtæki eins og Bláa lónið og Íslenska sjávarklasann sem dæmi um fyrirtæki sem hafa valið að vinna með hönnuðum í gegnum allt mótunarferlið.

Þorgerður hvatti Austfirðinga til að skapa sér sérstöðu í list- og verknámi og sagði Austurland hafa ákveðið forskot á sviði menningar og lista sem nýst gæti til uppbyggingar á áhugverðum valkostum í námi í skapandi greinum.

Árleg sýning SAM félagsins opnuð

Árleg sýning SAM félagsins grasrótarfélags skapandi fólks á lokaverkefnum austfirskra listahákólanema var opnuð í ME í tengslum við fyrirlesturinn. Að þessu sinni sýna sex Austfirðingar lokaverkefni en þau eru Elísabet Sara Tómasdóttir (arkitektúr), Leif Kristján Gjerde (tónsmíðar), Skúli Andrésson (kvikmyndagerð), Stefanía Ósk Ómarsdóttir (teiknimyndagerð og myndskreyting), Þórný Sigurjónsdóttir (myndskreyting) og Valgerður Jónsdóttir (textílhönnun). Sýningin verður opin á opnunartíma skólans til 30. nóvember n.k.