Hönnunarverkefnið „Austurland: Designs from Nowhere“ fékk Hönn­un­ar­verðlaun Íslands sem voru af­hent í síðustu viku eins og komið hefur fram í fréttum. „Það er mikil hvatning fyrir uppbyggingu skapandi greina á Austurlandi að verkefnið skuli hljóta þann heiður að fá  fyrstu hönnunarverðlaun Íslandssögunnar,“ segir verkefnastjóri skapandi greina hjá Austurbrú. 

Stofnun Hönnunarverðlauna Íslands er mikið fagnaðarefni fyrir íslenskt hönnunarsamfélag en vægi hönnunar í menningu okkar, samfélagi og viðskiptalífi er óðum að aukast og því mikilvægt vekja athygli á og auka skilning á gildi góðrar hönnunar. Þetta var í fyrsta skipti sem verðlaunin voru afhent og bárust dómnefnd ríf­lega hundrað til­nefn­ing­ar sem loks til­nefndi fjög­ur verk­efni er þóttu sig­ur­strang­leg­ust og reyndist Austurland: Designs from Nowhere hlutskarpast. 

Staðbundin hráefni og þekking

Austurland: Designs from Nowhere, er verkefni sem snýst um að kanna möguleika til framleiðslu og atvinnuuppbyggingar á Austurlandi, þar sem notast er við staðbundin hráefni og þekkingu. Karna Sigurðardóttir, vöruhönnuður og kvikmyndaleikstjóri, og Pete Collard, listrænn stjórnandi hjá Design Museum í London áttu frumkvæði að verkefninu og fengu til liðs við sig hönnuðina Þórunni Árnadóttur, Max Lamb, Juliu Lohmann og Gero Grundmann til að þróa sjálfstæð verkefni í nánu samstarfi við handverksfólk og fyrirtæki á Austfjörðum. 

Í tilkynningu frá dómnefnd segir: „Verkefnið þykir sýna á afar sannfærandi hátt að hlutverk hönnuða í dag felst í æ ríkari mæli í því að efla sýn og auka metnað til sköpunar og framleiðslu. Landsbyggðin hefur víða notið góðs af aðkomu hönnuða og hafa mörg sveitarfélög á Íslandi, fyrirtæki og bændur tekið þátt fjölbreyttum verkefnum á síðustu árum, þar sem leitast er við að finna nýjar leiðir í hráefnisnotkun og atvinnusköpun með mjög góðum árangri. Verkefnið, sem var bundið við Austurland, sýnir að með samstilltri sýn og virðingu fyrir menningu á hverjum stað, þar sem handverk, þekking og staðbundinn efniviður er kannaður til hlítar, felur í sér aukin tækifæri til að skapa framúrskarandi verk og hlýtur að vera hvatning öllum til handa.“

Mikil hvatning

„Það er mikil hvatning fyrir uppbyggingu skapandi greina á Austurlandi að verkefnið skuli hljóta þann heiður að fá  fyrstu hönnunarverðlaun Íslandssögunnar,“ segir Lára Vilbergsdóttir, verkefnastjóri skapandi greina hjá Austurbrú. Design From Nowhere byggir á hugmyndafræði MAKE by Þorpið sem fjallar um að hámarka nýtingu á staðbundum hráefnum, leiða saman ólíka þekkingu og færni og samnýta fjármuni og mannauð svæðisins.  Design From Nowhere er eitt af þeim verkefnum sem urðu til á lokaráðstefnu MAKE it happen sem var haldin í lok september 2012.  Þar varð til tengslanet sem leiddi til alþjóðlegrar samvinnu og samstarfs þvert á mismunandi bakgrunn, þekkingu og færni fólks innan og utan Austurlands. Í verkefninu er unnið með netagerðinni Egersund á Eskifirði, Markúsi Nolte og Þórhalli Árnasyni hjá Þorpssmiðjunni á Egilsstöðum, Hjörleifi Gunnlaugssyni í Neskaupstað, Vilmundi Þorgrímssyni á Djúpavogi ásamt hönnuðunum sem áður eru taldir upp.

Framlag Austurlands á Hönnunarmars

Verkefnið var sýnt sem framlag Austurlands á Hönnunarmars 2014 í Spark Design Space Reykjavík, síðan á sumarsýningu Sláturhússins á Egilsstöðum í sumar og einnig á London Design Festival í september 2014. Austurbrú hefur komið að verkefninu með styrkveitingum frá Menningarráði Austurlands og Vaxtarsamningi Austurlands en einnig hefur verkefnisstjóri skapandi greina hjá Austurbrú o.fl. ásamt SAM-félaginu grasrótarsamtökum skapandi fólks á Austurlandi lagt verkefninu lið. 

„Verkefnið hefur nú þegar vakið mikla athygli  á því kraftmikla starfi sem er í gangi á Austurlandi á sviði skapandi greina,“ segir Lára. „Hönnunarverðlaunin gefa byr í báða vængi og staðfesta að samstarf ólíkra aðila getur leitt til atvinnusköpunar sem byggir á sjálfbærni og möguleikum til að kynna Austurland fyrir heimsbyggðinni í gegnum einstaka vöru sem segir söguna um það hver við erum.“

Austurbrú óskar stjórnendum Körnu Sigurðardóttur og Pete Collard verkefnsstjórum verkefnisins og öllum sem komu að verkefninu til hamingju með þessa viðurkenningu.