Á föstudaginn var undirrituð viljayfirlýsing um samstarf á sviði þekkingarsköpunar í áliðnaði á Austurlandi. Samstarfið mun m.a. fela í sér stofnun þekkingar- og þróunarseturs fyrir ál þar sem verður haft frumkvæði að grunnmódelsmíði og tilraunum með efnið.

Viljayfirlýsingin var undirrituð á samráðsfundi um áframvinnslu áls sem haldin var á Breiðdalsvík föstudaginn var. Fundurinn var liður í verkefni sem Austurbrú vinnur að er snýr að áframvinnslu áls. Megintilgangur verkefnisins  er að skapa tengsl sem gætu komið að gagni í þeirri vinnu að gera álið að hráefnisauðlind á Austurlandi. Ennfremur verður unnið að því að koma á fót þekkingar- og þróunarsetri um áframvinnslu áls þar sem unnar verða nauðsynlegar rannsóknir og greiningar af sérfræðingum og var viljayfirlýsing þess efnis undirrituð á fundinum. Hún hljóðar svona:

„Eftirtaldir aðilar lýsa hér með yfir vilja til samstarfs um þekkingarsköpun í áliðnaði á Austurlandi; Samál, Háskólinn í Reykjavík (tækni- og verkfræðideild), Listaháskóli Íslands (vöruhönnun/hönnun og arkitektúr), Nýsköpunarmiðstöð Íslands, Verkmenntaskóli Austurlands og Austurbrú.

Einkum verður leitast við að þróa áfram eftirtalin verkefni:

– Austurbrú og Samál starfa saman um að stofnun þekkingar- og þróunarseturs fyrir ál þar sem m.a. verður haft frumkvæði að grunn módelsmíði/tilraunum með efnið. Kennarar frá Listaháskólanum munu jafnframt vinna að þróun verkefnsins í gegnum Austurbrú. Leitast verður við að koma upp nauðsynlegum búnaði og verkþekkingu til að vinna með ál (steypun/form). Ný FabLab-vinnustofa á Neskaupstað verður hluti af aðstöðu þekkingar- og hönnunarseturs auk þess sem leitað verður eftir samstarfi við fyrirtæki á svæðinu sem sýnt hafa áhuga á tilraunavinnslu með ál. Kennarar og nemendur Listaháskólans munu taka þátt í að móta og nýta starfsemi þekkingar- og hönnunarsetursins eins og við á.

– Háskólinn í Reykjavík og Nýsköpunarmiðstöð munu taka þátt í og styðja við bakið á verkefninu með tækniaðstoð, kennslu og rannsóknum eftir því sem kostur er.

Gert er ráð fyrir að samstarfið standi í að minnsta kosti þrjú ár. Nánari útfærsla og verkáætlun verður unnin í framhaldi af undirritun þessarar viljayfirlýsingar.“

Undir þessa yfirlýsingu skrifuðu: Magnús Ásmundsson frá Alcoa Fjarðaáli, Einar Jón Ásbjönsson frá Háskólanum í Reykjavík, Jóna Árný Þórðardóttir frá Austurbrú, Berglind Hallgrímsdóttir frá Nýsköpunarmiðstöð Íslands og Elvar Jónsson frá Verkmenntaskóla Austurlands.