Menningarhátíðin Dagar myrkurs verður með breyttu sniði að ári en hátíðin hefur verið haldin árlega á Austurlandi frá síðustu aldamótum. Austurbrú hefur stýrt verkefninu síðustu ár og segir verkefnastjóri þess að ætlunin sé að stytta hátíðina og markaðssetja hana á markvissari hátt.

Dagar myrkurs voru haldnir í fyrsta sinn í nóvember árið 2000 en þetta er byggðahátíð á Austurlandi þar sem gervallur landshlutinn leggst á eitt við að gera íbúum og gestum þeirra glaða daga í svartasta skammdeginu og lýsa þá upp með skírskotun í ríkan drauga- og vættaarf sem Austfirðingar eiga. Vinnuhópur um Myrka daga, sem í sitja fulltrúar sveitarfélaganna, þjónustuaðila, ferðaþjónustufyrirtækja og Austurbrúar, hefur hist að undanförnu og reynt að leggja mat á hvernig til hefur tekist en Jónína Brynjólfsdóttir, verkefnastjóri, heldur utan um Myrka daga fyrir hönd Austurbrúar.

„Meðal niðurstaðna hjá hópnum eru þær að tryggja þurfi fjármagn til að standa straum af kostnaði við verkefnastjóra á heilsársgrundvelli en þannig yrði hægt að hefja undirbúning og skipulagningu fyrr, jafnvel um leið og hátíðinni lýkur á ári hverju,“ segir hún og bætir við: „Vinnuhópurinn leggur líka ríka áherslu á að verkefnið sé byggt á samstarfi allra þeirra sem tengjast markaðs- og menningarmálum á Austurlandi með aðkomu sveitafélaganna.“

Jónína segir vinnuhópinn hafa verið sammála um að þörf sé á markvissari markaðssetningu Daga myrkurs. Skilgreina þurfi markhópa og staðsetningu þeirra, hanna þurfi útlit og lógó sem og skipuleggja markaðssetninguna m.t.t. möguleika samfélagsmiðla og nýrrar samskiptatækni. Þá er lagt er til að stytta hátíðina úr tíu dögum í fjóra daga. Hátíðin skuli hefjast á miðvikudagskvöldi og ljúka á sunnudagskvöldi. „Með þessum hætti vonumst við til að skerpa á hugmyndinni þannig að Dagar myrkurs verði glæsileg menningarhátíð sem veki ekki bara áhuga Austfirðinga heldur landsmanna allra,“ segir Jónína.