Í dag verða útskrifaðir nítján nemendur úr grunnnámi Stóriðjuskóla Fjarðaáls. Við ræddum við einn útskriftarnema sem tókst óhræddur á við námið þrátt fyrir að það séu um fjórir áratugir síðan hann sat síðast á skólabekk.

Þetta er í annað skipti sem grunnhópur er útskrifaður en Stóriðjuskólinn var fyrst settur í september 2011. Nemendurnir sem útskrifast að þessu sinni hófu nám í september 2013 en grunnnámið tekur þrjár annir. Alls eru nítján sem útskrifast í dag í Fróðleiksmolanum á Reyðarfirði og er Guðmundur Svavar Kjartansson einn þeirra.

„Það er var orðið langt um liðið frá því að ég settist á skólabekk,“ segir hann aðspurður um hvenær hann hafi síðast legið í skólabókunum. Hann er 62 ára gamall, fæddur og uppalinn á Súðavík, og flutti austur ásamt eiginkonu sinni árið 2009 þegar hann hóf störf í álveri Fjarðaáls í kerskálanum. „Ég var í Búnaðarskólanum árið 1970 eða 1971 og var reyndar byrjaður í iðnnámi nokkrum árum síðar en hætti því,“ segir hann en Guðmundur hefur stóran hluta starfsævi sinnar verið sjómaður og bóndi. „Ég kom í land 2007 og byrjaði að vinna í verslun en hætti því tveimur árum síðar þegar hún dró saman seglin. Þá flutti ég austur á Reyðarfjörð og hef verið þar alla tíð síðan.“

Hann segir að það hafi verið bæði gaman og krefjandi að taka þátt í stóriðjunáminu. Hann hafði haft mikinn áhuga á að komast í skólann, sótti um áður en fékk ekki inngöngu vegna þess hversu stuttan starfsaldur hann hafði hjá álverinu en komst inn haustið 2013. „Það var sérstakt að byrja aftur í námi,“ segir hann. „Það reyndi talsvert á mann en ég var aldrei stressaður enda stressast ég ekki auðveldlega upp.“

Hann segir stærðfræðina hafa höfðað mest til sín en bætir við að tölvunámið hefði mátt vera viðameira. „Ég er kominn á þann aldur, er næstelstur í hópnum, að ég þarf talsverða hjálp við tölvurnar. Maður fæðist ekki með þessa kunnáttu eins og börn virðast gera í dag.“

Guðmundur ætlar að halda áfram í stóriðjuskólanum og fer gallvaskur í framhaldsnámið sem hefst eftir áramót. „Ég fór í þetta nám vegna áhugans og hann er hvergi nærri þrotinn,“ segir hann og bætir við að lokum: „Mér finnst námið gera vinnuna skemmtilegri, brýtur upp rútínuna.“

Þess má geta að 16. desember fer fram útskrift úr framhaldsnámi stóriðjuskólans. Sá hópur lýkur námi eftir fjórar annir.