Austurbrú, ásamt samstarfsaðilum á Borgundarhólmi í Danmörku, Suðurey í Færeyjum og Vesterålen í Noregi vinnur nú að viðamikilli rannsókn þar sem leitast er við að kortleggja virði brottflutts ungs fólks til heimahaganna í gegnum menningarviðburði. 

Í því skyni eru notaðar fjórar austfirskar hátíðir: Sviðamessan á Djúpavogi, Eistnaflug í Neskaupstað, Bræðslan á Borgarfirði og LungA á Seyðisfirði. Allar eiga þessar hátíðir sameiginlegt að brottfluttir Austfirðingar annað hvort standa fyrir þeim og skipuleggja eða spila stórt hlutverk við undirbúning þeirra og framkvæmd, að sjálfsögðu með dyggri hjálp heimamanna.

Hagræn áhrif hátíðanna eru könnuð en einnig félagsauðurinn sem í fólkinu, sem að þeim kemur, býr. Þá viljum við gera tilraun til að kortleggja menningarauð í fjórðungnum. Í því skyni höfum við samið spurningakönnun (sjá https://www.surveymonkey.com/s/YNYXCCJ). Hún er ætluð fólki með búsetu á Austurlandi og með henni vonumst við til að kortleggja menningarauð svæðisins. Menningarauður er að mörgu leyti óljóst fyrirbæri en þeir þættir sem hér eru kannaðar eru meðal annars menntunarstig, þátttaka í menningarviðburðum og skipulagning þeirra, tækifæri til þátttöku, viðhorf og samfélagsgerð sem undirbyggir menningarauð, ætthagaást, viðhorf og mat á getu samfélagsins til að takast á við ágreining.

Þeim mun betri svörun sem við fáum, þeim mun áreiðanlegri vísbendingar fáum við. Vonast er til að niðurstöður rannsóknarinnar í heild varpi sérstaklega ljósi á tvennt. Þann mannauð sem felst í þeim sem flust hafa af svæðinu en vilja ennþá leggja því lið með mismunandi hætti og svo hitt, nefnilega virði sjálfra menningarviðburðanna. Í framhaldinu má greina tækifærin fyrir byggðirnar sem í þessu tvennu liggja til framþróunar og styrkingar.