Samþykkt hefur verið að ganga til samninga við Hús handanna um rekstur Upplýsingamiðstöðvar Austurlands (UA) en hún hefur verið lokuð síðan í byrjun nóvember. Stefnt er að því að semja til eins árs.

Þetta er niðurstaða stýrihóps sem Austurbrú hefur umsjón með en hann var skipaður í kjölfar fundar Ferðamálasamtaka Austurlands (FAUST) sem haldin var skömmu eftir lokunina. Í honum eiga sæti fulltrúar frá sveitarfélögum á Austurlandi og FAUST. Hópurinn hefur fundað reglulega og er megin niðurstaða hans sú að ganga til samninga við Hús Handanna á Egilsstöðum um rekstur UA, landshlutamiðstöðvar sem starfar samkvæmt skilgreiningum og samningi við Ferðamálastofu.

Af þessu tilefni vill stýrihópurinn koma eftirfarandi á framfæri:

a.            Um eins árs ráðstöfun er að ræða þ.e. samning fyrir árið 2015.

b.            Ákvörðun byggir m.a. á því að hér sé um nærtækustu lausnina að ræða.

c.            Erfitt er að samtvinna svæðismiðstöð undir nýjum formerkjum og landshlutamiðstöð mv. núverandi samningaumhverfi við Ferðamálastofu.

d.            Álíka samstarf er að finna á öðrum stöðum á landinu.

e.            Um ráðstöfun til eins árs er að ræða og reiknað er með að álíka stýrihópur vinni á árinu að framtíðarsýn upplýsingarmiðlunar til ferðamanna í fjórðungnum