Í næstu viku stendur Austurbrú fyrir kynningu um stuðning við atvinnurekstur kvenna. Fulltrúar Byggðastofnunar og Vinnumálastofnunar kynna mismunandi verkefni og leiðir fyrir konur sem vilja stofna eigin atvinnurekstur. Kynningin er haldin í samstarfi við TAK – Tengslanet austfirskra kvenna og verður á Egilsstöðum og Reyðarfirði dagana 20. og 21. janúar.

Fyrirtæki í eigu kvenna eða fyrirtæki sem stýrt er af konum eru í miklum minnihluta fyrirtækja í viðskiptum við fjármálafyrirtæki, einkum í landsbyggðunum. Hlestu ástæður sem nefndar hafa verið eru t.d. að vinnumarkaður landsbyggðanna sé mjög karllægur, í öðru lagi að karlar séu ráðandi í stjórnun fyrirtækja og í þriðja lagi að lánareglur séu þannig að þær henti illa tegundum og stærð fyrirtækja sem konur stofna. Oft á tíðum vantar konur, sem eru að fara af stað með rekstur, fjármagn til að kaupa tæki og búnað sem þarf til að koma fyrirtækinu af stað og víða í löndunum í kringum okkur eru starfræktir sérstakir lánasjóðir fyrir konur sem vilja fara út í rekstur fyrirtækja eða efla rekstur núverandi fyrirtækis. Oft er um að ræða lítil fyrirtæki í byrjun sem bera illa háan fjármagnskostnað t.d vegna kaupa á atvinnuhúsnæði, en þannig fyrirtæki sækjast heldur eftir leiguhúsnæði á meðan þau eru að vaxa úr grasi. Árlega úthlutar velferðarráðherra styrkjum til kvenna með góðar viðskiptahugmyndir og verkefni. Styrkirnir geta numið allt að þremur milljónum króna, og er hægt að sækja um styrki til gerðar viðskiptaáætlana, markaðssetningar og vöruþróunar. 

Á fundinum verður fjallað um þessi mál vítt og breytt en svo munu fjögur austfirsk sprotafyrirtæki í eigu kvenna kynna sig. Nánari dagskrá verður kynnt á allra næstu dögum.