Sautján umsóknir bárust um starf verkefnastjóra brothættra byggða. Framkvæmdastjóri Austurbrúar segir slíkan áhuga mikið gleðiefni enda sé verkefnið mikilvægt og hafi mikla þýðingu fyrir byggð á Austurlandi. 

Umsóknarfrestur um starfið rann út þann 31. janúar en verkefnið „Brothættar byggðir á Austurlandi“ er til þriggja ára og megin tilgangur þess er að efla byggð og mannlíf í þeim byggðarkjörnum fjórðungsins sem eiga undir högg að sækja en starfið var búið til með stuðningi frá Byggðastofnun. Meðal verkefna sem bíða nýs verkefnastjóra er að hafa frumkvæði að nýjum verkefnum í byggðunum, setja á laggirnar íbúafundi og fleira til að virkja þátttöku almennings. 

Jóna Árný Þórðardóttir, framkvæmdastjóri Austurbrúar, segir þennan mikla áhuga á starfinu afar gleðilegan. „Þetta verkefni er brýnt og getur haft mikla þýðingu fyrir fjórðunginn takist vel til,“ segir hún. „Þess vegna er gott að geta valið úr svona stórum hópi umsækjenda,“ bætir hún við og segir ennfremur að það sé góð tilhugsun að svo mikill áhugi sé að vinna hjá Austurbrú. 

Sem fyrr segir bárust sautján umsóknir um starfið og er reiknað með að úrvinnsla umsókna og ráðningarferlið taki um þrjár vikur.