Ferðasýningin Austurland að Glettingi verður haldin föstudaginn 27. mars í Fjarðabyggðarhöllinni á Reyðarfirði. Þar gefst almenningi kostur á kynna sér hvað ferðaþjónustan á Austurlandi hefur upp á að bjóða.

Sýningin er tilkomin vegna aðalfundar Samtaka ferðaþjónustunnar (SAF) sem haldinn verður á Egilsstöðum á fimmtudaginn. Ákveðið var að nýta tækifærið og blása til austfirskrar ferðakynningar sem fékk heitið Austurland að Glettingi og hefur Austurbrú séð um skipulagningu og utanumhald að mestu.

Sem fyrr segir verður sýningin í Fjarðabyggðarhöllinni og segir María Hjálmarsdóttir, verkefnastjóri hjá Austurbrú, að gestir muni upplifa ferðaþjónustu á Austurlandi með óvenju skemmtilegum hætti. “Útlínur Austurlands  verða mótaðar í gervigrasið í höllinni og hvert og eitt ferðaþjónustufyrirtæki verður staðsett þar sem það er landfræðilega,” segir hún. Gestir ferðast á puttanum milli staða og kynnast ferðaþjónustuaðilum og þeirra þjónustu. Holuhraun og Vatnajökull koma við sögu en María vill ekki gefa upp alltof mikið enda á þetta að vera spennandi!

Alls hafa 40 fyrirtæki skráð sig til leiks og 80 manns frá SAF hafa staðfest komu sína. María segir ferðasýninguna Austurland að Glettingi hafa mikla þýðingu. Það sé mikilvægt að sýna það sem fjórðungurinn hafi upp á að bjóða og opna þannig möguleika á samstarfi við ferðaþjónustuaðila annars staðar á landinu. Þá sé mikilvægt að vekja athygli á þeim miklu tækifærum sem bjóðast á Austurlandi. “Það hefur töluverð uppbygging átt sér stað á undanförnum árum í ferðamennsku hér í fjórðungnum og ég held að það sé mikilvægt að gefa almenningi tækifæri til að sjá þessa þróun með berum augum,” segir María og fullyrðir að tækifærin í ferðamennskunni séu úti á landsbyggðinni.

Sýningin er opin almenningi milli klukkan 14 og 17 og það kostar ekkert inn.

Gott er að mæta vel klæddur!

Sjá auglýsingu.

Frekari upplýsingar veitir María Hjálmarsdóttir í síma 848 2218 / netfang: [email protected]