Þann 21. apríl var haldið vel heppnað örnámskeið á vegum Nýsköpunarmiðstöðvar og Austurbrúar í frumkvöðlasetrinu Djúpinu á Djúpavogi.

Alls komu níu þátttakendur á Djúpavogi, sem verður að teljast góð þátttaka í ljósi þess að kóræfing var sama kvöldið og að auki var undirbúningur fyrir Hammondhátíð á lokastigi. Sigurður Steingrímsson, verkefnstjóri, kynnti m.a. starfsemi Impru á Nýsköpunarmiðstöð, sem býður frumkvöðlum og litlum fyrirtækjum upp á handleiðslu endurgjaldslaust. Sú kynning var mjög gagnleg að sögn þátttakenda. Þeim fannst námskeiðið í heild mjög áhugavert og skemmtilegt og hvetja til fleiri viðburða af svipuðu tagi.  Sigurður var með skemmtilega nálgun og hvatti þátttakendur til sveigjanlegrar og frumlegrar hugsunar út fyrir kassann, frá fjölbreyttum sjónarhornum. Einmitt það er einn helsti kostur frumkvöðla og þeirra sem vinna að nýsköpun, hæfileikinn til að læra nýja hluti og bregðast við og aðlagast aðstæðum.

Námskeiðið var líka haldið á Egilsstöðum og í Neskaupstað. 

Nánari upplýsingar veitir Katrín Reynisdóttir, verkefnastjóri, í síma 470 3870.