Á dögunum fékkst styrkur til að hrinda í framkvæmd verkefninu ,,Stafræn framleiðsla fyrir alla“ en um er að ræða samstarfsverkefni Austurbrúar, Verkmenntaskóla Austurlands og Fab Lab Austurlands. Markmiðið er að auka þekkingu á upplýsingatækni og hagnýtingu hennar hjá markhópi framhaldsfræðslunnar og að skapa þekkingu sem hvetur til frumkvöðlastarfs og nýsköpunar.  

Það er Þróunarsjóður framhaldsfræðslu sem veitir styrkinn en um er að ræða 2,3 milljónir króna og fékkst hann til að þróa og tilraunakenna á námskeiðaröðina ,,Stafræn framleiðsla fyrir alla“. Áhersla er á upplýsingatækni, nýsköpun og frumkvæði en lítið framboð er á slíku námi úti á landi. Röðin innifelur fimm tækninámskeið fyrir fólk með stutta formlega menntun og þátttakendur geta sótt eitt eða fleiri námskeið eftir áhugasviði.

Markmiðið með verkefninu er að auka þekkingu á upplýsingatækni og hagnýtingu hennar hjá markhópi framhaldsfræðslunnar og að skapa þekkingu sem hvetur til frumkvöðlastarfs og nýsköpunar. Opinn hugbúnaður verður notaður við kennsluna svo nemendur geta unnið áfram eftir að námskeiði lýkur án þess að leggja út í mikinn kostnað.

Verkefnið er unnið í samstarfi við Verkmenntaskóla Austurlands og Fab Lab Austurlands og er stýrt af Lilju Guðnýju Jóhannsdóttur, Fab Lab-stjóra. „Nýjungin í þessu verkefni felst í því að opna möguleika Fab Lab-smiðja fyrir markhóp framhaldsfræðslunnar, þ.e. fólks með stutta formlega menntun að baki, bæði í framsetningu námsins sem slíks og einnig með tímafyrirkomulagi en það verður miðað við að einstaklingar af vinnumarkaði geti sótt námskeiðin,“ segir hún. Lilja Guðný telur verkefnið eiga brýnt erindi:

„Skortur er á tæknimenntun á Íslandi, svo mikill að Samtök atvinnulífsins fullyrða að það standi atvinnulífinu fyrir þrifum hve lítið er af tæknimenntuðu fólki. Það skiptir því máli að auka tækniþekkingu og einnig skapandi hugsun og frumkvæði, enda eru allir þessir eiginleikar mikilvægir hjá starfsfólki framtíðarinnar.“

Verkefnið hefst í haust og lýkur næsta vor.    

Nánari upplýsingar veitir Lilja Guðný Jóhannsdóttir / [email protected]