Austurbrú hefur undanfarið unnið að verkefni ásamt Vopnafjarðarhreppi og fleirum sem miðar að því að koma á fót framhaldsskóladeild á Vopnafirði svo vopnfirsk ungmenni geti dvalið lengur í heimahúsum.

Else Möller, starfsmaður okkar á Vopnafirði, hefur leitt þessa vinnu af hálfu Austurbrúar og að hennar sögn miðar vinnunni vel og vonast hún til þess  að af þessu verði frá og með næsta hausti í samstarfi við framhaldsskólann á Laugum.

Í síðustu viku fóru nemendur 10. bekkjar í heimsókn til skólans og var gist yfir nótt. Framhaldsskólinn hafði boðið nemendum frá Vopnafirði, Bakkafirði og Þórshöfn á kynningarfund í skólanum til að kynna starfsemi skólans og til að gefa nemendum tækifæri til upplifa skólann og skólalífið „að innan“.

„Það var tekið vel á móti okkur af námsráðgjafa skólans, Maríu Jónsdóttur, og skólameistaranum Sigurbirni A. Arngrímssyni. Þau fóru vel yfir starfsemi, námsframboð, stefnu og markmið skólans. Síðan var okkar sýnd heimavistin þar sem nemendur fengu að gista,“ segir Else og heldur áfram: „Nemendur fengu kynningu á skólanum þar sem fram komu upplýsingar um hvernig kennslu væri háttað. Þá var þeim sagt frá samstarfinu við menntasetrið á Þórshöfn, skólaumhverfinu, nemendafélaginu og félagslífi.“

Else hefur unnið að þessu verkefni í nokkra mánuði en þetta er í þriðja skipti sem reynt er að fá framhaldsdeild af stað hér á Vopnafirði. „Mér finnst vera meiri jákvæðni í kringum verkefnið núna. Bæði hefur verið gefið vilyrði um fjármagn frá Menntamálaráðuneytinu og sveitastjórnin er að vinna í húsnæðismálum fyrir nemendur á Vopnafirði. Ennfremur er samningur á milli framhaldsskólans á Laugum, Vopnafjarðarhrepps og Austurbrúar í vinnslu,“ segir hún en hlutverk Austurbrúar er að fylgja málinu eftir þar til það er komið í höfn. Else bætir við að lokum: „Samt er þetta á endanum alltaf spurning um hvort krakkarnir vilji þetta sjálfir eða hvort þeir vilji fara að heiman eftir 10. bekk.“