Alls bárust 149 umsóknir til Uppbyggingarsjóðs Austurlands en umsóknarfresturinn rann út 15. desember. Verkefnastjóri sjóðsins segir að það hafi komið sér skemmtilega á óvart hversu margar umsóknir bárust að þessu sinni.

Nokkuð fleiri umsóknir bárust en þegar sjóðurinn úthlutaði síðast í vor. Þá bárust um 130 umsóknir. Signý Ormarsdóttir, verkefnastjóri Uppbyggingarsjóðs Austurlands, segist lítið vilja fullyrða um ástæður aukins áhuga en að þetta hafi komið skemmtilega á óvart. „Við létum þýða úthlutunarreglur og umsóknareyðublað yfir á ensku og það virðist hafa haft talsverð áhrif á nokkra umsækjendur sem skiluðu sínum umsóknum á ensku. Þannig að þetta hefur eflaust hjálpað þótt örugglega komi fleira til,“ segir hún.

Signý segir að sótt hafi verið um fjármagn í mörg metnaðarfull verkefni. „Ég sé að það er mikil gróska í menningunni, stór og spennandi verkefni greinlega í bígerð, en heilt yfir má segja að þarna séu mörg spennandi uppbyggingarverkefni á öllum sviðum nýsköpunar- og atvinnuþróunar, hvort sem um ræðir menningu, ferðamennsku eða eitthvað annað. 

Það kom nokkrum á óvart að Uppbyggingarsjóðurinn skyldi auglýsa eftir umsóknum jafn snemma og raun ber vitni en aðeins verður um þessa einu úthlutun að ræða fyrir árið 2016. Signý segir að það hafi verið mikilvægt að auglýsa núna. „Það skiptir máli að geta auglýst snemma,“ segir hún. „Þannig getur fólk séð fjármögnunarstöðu sinna verkefna í upphafi árs og vonandi leiðir það til aukinnar samfellu í starfsemi menningar- og annarrar atvinnusköpunar. Eftir því hefur verið kallað.“

Reiknað er með að úthlutað verði úr Uppbyggingarsjóði Austurlands um mánaðarmótin janúar/febrúar á nýju ári.