Síðastliðið haust tóku sjö nemendur af erlendum uppruna þátt í námskeiðinu „Íslenska fyrir útlendinga“ sem haldið var á vegum Austurbrúar á Vopnafirði en alls voru haldin fimm slík námskeið á Austurlandi í haust sem um fimmtíu nemendur sóttu.  

Að tala íslensku er alls ekki auðvelt nema maður hafi lært tungumálið frá barnsaldri og að leggja það á sig að læra íslensku á fullorðinsaldri getur vera mjög erfitt og krefjandi. Ekki síst þegar fólk er í fullri vinnu. Flestir gera sér þó grein fyrir því að það er hluti af því að setjast að í nýju landi að tileinka sér tungumálið enda er það lykillinn að fólkinu og menningu þess.

Fyrir nokkrum árum var fátt í boði fyrir nýbúa sem komu til Vopnafjarðar þegar kom að tungumálakennslu. Hver og einn reyndi því að tileinka sér íslensku eftir getu en þetta hefur breyst og aðgengi að þekkingu, námskeiðum og fjarnámi hefur aukist á Vopnafirði. Íslenskunámskeiðum – og reyndar flestum tungumálanámskeiðum – er hægt að koma af stað ef eftirspurnin er til staðar.

Hjá Austurbrú voru haldin fimm íslenskunámskeið fyrir útlendinga í haust sem um fimmtíu manns sóttu. Á Vopnafirði voru sjö nemendur en það var Sigríður Sigþórsdóttir sem leiðbeindi. Nemendurnir voru frá Búlgaríu, Svartfjallalandi, Tælandi, Ástralíu og Danmörku. Lauk námskeiðinu með prófi og fengu allir nemendur viðurkenningarskjal að lokum. Síðasti dagur námsins fór fram í Engihlíð þar sem þátttakendur komu með dæmi um matarhefðir frá sínu heimalandi.