Prófahald er viðamikill þáttur í þjónustu við nemendur og ærinn tími starfsmanna Austurbrúar fer í umsýslu með prófum. Árið 2015 tóku 252 nemendur 777 próf í starfsstöðvum Austurbrúar. 

Próftökur dreifast yfir árið þó svo að próftörnin spanni yfirleitt tvær vikur í lok hverrar annar eins og eðlilegt er. Fjarnemar taka próf á þeirri starfsstöð sem er næst þeim en starfsstöðvar Austurbrúar eru á Vopnafirði, Egilsstöðum, Seyðisfirði, Reyðarfirði, Neskaupstað og í apríl í fyrra opnaði starfsstöð á Djúpavogi. 

Við sérstakar aðstæður sækir einn og einn staðnemi um að fá að taka próf á starfsstöð Austurbrúar. Auk þess geta komið upp tilfelli þar sem veður og færð koma í veg fyrir að nemandi komist á næstu starfsstöð en þá hafa grunnskólar verið mjög liðlegir við að taka á móti nemendum.

Flest próf á Egilsstöðum

Árið 2015 tóku 252 nemendur sem 777 próf á vegum Austurbrúar. Hafa má í huga að líklega eru fleiri einstaklingar búsettir á Austurlandi í námi en tölurnar í þessari frétt miðast við nemendur sem tóku próf árið 2015 á vegum Austurbrúar. Flest prófin voru tekin á Egilsstöðum, 420 talsins eða liðlega 54% (126 nemendur). Á Reyðarfirði voru 174 próf eða um 22% (63 nemendur). Í Neskaupstað voru tekin 65 próf (21 nemandi) og 64 á Vopnafirði (21 nemandi). Á nýrri starfsstöð Austurbrúar á Djúpavogi voru 42 próf tekin (15 nemendur), 5 á Seyðisfirði (3 nemendur) og Breiðdalsvík (1 nemandi) og 2 á Fáskrúðsfirði (2 nemendur).

126 nemendur tóku 420 próf á Egilsstöðum. 63 nemendur tóku 174 próf á Reyðarfirði, 21 nemandi tók 65 próf í Neskaupstað og 21 nemandi tók 64 próf á Vopnafirði. Þrír nemendur tóku 5 próf á Seyðisfirði, 2 nemendur tóku sitt hvort prófið á Fáskrúðsfirði og 1 nemandi tók 5 próf á Breiðdalsvík. Meistara- og doktorsnemar eru ekki skráðir í þessa samantekt né þeir sem mögulega eru í próflausum námskeiðum. 

Þess má geta að lokum að nemendur við hátt í 20 skóla þreyttu próf hjá okkur í fyrra, þar af einn frá sænskum háskóla.