Ársfundur Sjálfbærniverkefnisins verður haldinn í Valaskjálf, Egilsstöðum,  þriðjudaginn 3. maí kl. 14 – 18. Að þessu sinni er sjónum beint að stöðu og framtíð verkefnisins.

Sjálfbærniverkefnið er starfrækt að frumkvæði Alcoa og Landsvirkjunar í þeim tilgangi að fylgjast með áhrifum virkjunar og álvers á Reyðarfirði á samfélag, umhverfi og efnahag á Austurlandi. Ársfundir þess eru opnir öllum og ástæða til hvetja áhugasama um samfélagsþróun til að mæta og fræðast um framvindu og niðurstöður.

Að þessu sinni verður ársfundur verkefnisins nýttur til að beina sjónum að stöðu verkefnisins sjálfs.

Auk umfjöllunar um áhugaverðar niðurstöður vöktunar í Sjálfbærniverkefninu á síðasta ári verða flutt erindi tengd markmiðum verkefnisins. 

Árni Óðinsson, fulltrúi Landsvirkjunar í stýrihóp verkefnisins ætlar að fara yfir sögu verkefnisins og stöðu,   Valur Knútsson, yfirverkefnisstjóri hjá Landsvirkjun, segir frá Sjálfbærniverkefni sem er að fara af stað á Norðurlandi og Björg Björnsdóttir, verkefnastjóri sveitarstjórnarmála ætlar að fjalla um sóknaráætlun Austurlands og helstu niðurstöður íbúafundarins Austurlandið mitt sem haldinn var 15. mars.

Hópavinna fær talsvert rými á fundinum og verður þar unnið með viðfangsefni tengd stöðu og framtíðarsýn verkefnisins.

Fundarstjóri verður Björn Ingimarsson, bæjarstjóri Fljótsdalshéraðs.

Allir eru velkomnir á fundinn en óskað er eftir því að fólk skrái sig. Skráningarform og aðrar upplýsingar um verkefnið og ársfundinn er að finna á vef verkefnisins, sjalfbaerni.is

Nánari upplýsingar veitir Guðrún Áslaug Jónsdóttir ([email protected]), hjá Austurbrú í síma 470 3830.