Austurbrú, í samstarfi við Skaftfell – miðstöð myndlistar á Austurlandi og SAM félagið grasrótarsamtök skapandi fólks, býður grunn- og framhaldsskólum á Austurlandi til samtals um þróun og eflingu listgreinakennslu. Haldin verður vinnustofa laugardaginn 5. nóvember á Skriðuklaustri á Fljótsdalshéraði þar sem m.a. verður rætt um skapandi nálgun og rannsóknir í efni sem leiða til sjálfbærni, umhverfis og grenndarvitundar.

Tekinn verður upp þráðurinn þar sem frá var horfið í lok árs 2014 en þá var haldin vinnustofa í samstarfi við LungA skólann um eflingu námstækifæra í skapandi greinum í tengslum við Sóknaráætlun 2014. „Þar komu fram ýmsir áhugaverðir punktar og hugmyndir sem vel væri hægt að þróa áfram og gætu leitt af sér öflugra listgreinakennslu á Austurlandi ef við höldum vel á spöðunum,“ segir Hanna Christel Sigurkarlsdóttur, fræðslufulltrúi Skaftfells.

Haldin verður vinnustofa laugardaginn 5. nóvember á Skriðuklaustri á Fljótsdalshéraði þar sem m.a. verður rætt um skapandi nálgun og rannsóknir í efni sem leiða til sjálfbærni, umhverfis og grenndarvitundar. Einnig verður tekin umræða um hvernig utanaðkomandi verkefni geta leyst sköpunarkraft úr læðingi og hvort skólabúðir í listkennslu gætu verið góður valkostur fyrir grunnskólana.

Gunndís Ýr Finnbogadóttir frá Listaháskóla Íslands og Guja Dögg Hauksdóttir fyrir hönd Myndlistaskóla Reykjavíkur verða með erindi ásamt Unu Sigurðardóttir frá Sköpunarmiðstöðinni á Stöðvarfirði og Hönnu Christel sem kynna skólabúðir og fræðsluverkefni Skaftfells. Góður tími verður fyrir umræður og skoðanaskipti og áhersla lögð á að móta sameiginlegar áherslur sem miða að heildarsýn um eflingu listgreinakennslu og að Austurland verði í framtíðinni raunhæfur valkostur fyrir þá sem vilja undibúa sig fyrir áframhaldandi listnám á háskólastigi. „Við hvetjum að sjálfsögðu alla listgreinakennara að mæta og auk skólastjórnenda og allra þeirra sem áhugasamir eru um að gera listgreinakennslu hærra undir höfði.“  

Dagskráin hefst kl.10:30 og stendur til 17:00.

Sjá nánar hér.