Um fimmtíu manns úr ferðaþjónustunni á Austurlandi hittust í Végarði í Fljótsdal í þeim tilgangi að ræða og fræðast um stöðu og horfur í ferðaþjónustunni á Íslandi. Yfirskrift málstofunnar var „Þekkir þú þína mjólkurkú?“ og flutt voru ýmis erindi er snertu á rekstri og umhverfi ferðaþjónustunnar. Þá veitti Austurbrú tveimur framúrskarandi ferðaþjónustufyrirtækjum viðurkenningu.  

Það voru Austurbrú og Ferðamálasamtök Austurlands sem boðuðu til fundarins. Jóna Árný Þórðardóttir fór yfir könnun um stöðu og horfur í ferðaþjónustu á landinu þar sem ferðaþjónar voru spurðir um ýmsa þætti í sínum rekstri og rekstarumhverfi. Sævar Kristinsson, sérfræðingur hjá KPMG, hélt erindi er kallaðist „Framtíð ferðaþjónustunnar á Íslandi til ársins 2030“. Þar fór hann yfir mögulegar sviðsmyndir fyrir ferðaþjónustuna eftir fjórtán ár þ.e. greindar voru fjórar mismunandi sviðsmyndir og voru þátttakendur málstofunnar fengnir í framhaldinu til að ræða þær í hópavinnu og meta hvaða áhrif þær gætu haft á rekstur ferðaþjónustunnar og samfélagið í heild.

María Hjálmarsdóttir, verkefnastjóri hjá Austurbrú, fjallaði um verkefnið „Áfangastaðurinn Austurland“ og sagði frá helstu áföngum þess verkefnis og markmið næsta árs.

Svava Ólafssdóttir hjá Startup Tourism sagði frá fyrirtækinu sínu og þeim tækifærum sem það býður frumkvöðlum í ferðaþjónustu. Startup Tourism er tíu vikna viðskiptahraðall þar sem allt að tíu sérvalin sprotafyrirtæki í ferðaþjónustu fá tækifæri til að þróa áfram viðskiptahugmyndir sínar undir leiðsögn sérfræðinga.

Að lokum sagði Magnús Guðjónsson hjá Ambassador Whale Watching á Akureyri frá sögu fyrirtækisins, hvernig það varð til, helstu áskorunum og gaf síðan þátttakendum góð ráð en hann segir að fólk megi aldrei tapa trúnni á hugmyndinni sinni og vinnusemi skili sér alltaf í góðum rekstri.

Þátttakendur fengu síðan tækifæri til að hitta og ræða við fyrirlesara auk þess sem fulltrúar frá Arion-banka, Austurbrú, SSA, Deloitte, Ferðamálasamtökum Austurlands, Vinnueftirlitinu o.fl. buðu fram aðstoð og ráðgjöf til ferðaþjóna enda að mörgu að huga þegar kemur að rekstri slíkra fyrirtækja.

Þá veitti Austurbrú tvær viðurkenningar í gær en þær voru veittar fyrir árið 2015. Annars vegar fékk Óbyggðasetur Íslands viðurkenningu fyrir frumkvöðlastarf í ferðaþjónustu eystra og sagði Jóna Árný Þórðardóttir, framkvæmdastjóri Austurbrúar, við þetta tilefni að öllum ætti að vera ljóst hversu gríðarlega metnaðarfullt og frumlegt verkefni Óbyggðasetrið væri. Þá fékk Gistihúsið á Egilsstöðum viðurkenningu sem „Fyrirmyndarfyrirtæki í ferðaþjónustu“. Þar hefur fagmennska ætíð verið í fyrirrúmi og þá hefur sókn í uppbyggingu fyrirtækisins verið áberandi á síðustu misserum og einstaklega athyglivert og gaman að fylgjast með vexti þess.

Við hjá Austurbrú óskum Óbyggðasetrinu og Gistihúsinu hjartanlega til hamingju og vonum að þessar viðurkenningar virki sem hvatning fyrir ferðaþjónustuna á svæðinu til að gera enn betur.

Við þökkum þeim sem tóku þátt í þessum degi og látum eina viðeigandi vísu fylgja með sem Philip Vogler, leiðsegjandi og þýðandi, setti saman í Fljótsdalnum í gær:

Nýtum undur Austurlands,

okkar bætum hag

svo þjóna fáum þúsund manns

í þægindum hvern dag.

F.v. Arna Björg Bjarnadóttir frá Óbyggðasetrinu, Jóna Árný og Þórhallur Jóhannsson frá Gistihúsi Egilsstaða.