Austurbrú hefur umsjón með fjarprófum háskólanema og nú líður senn upp sú stund að þeir, sem og aðrir nemendur við aðra skóla, þreyta próf með tilheyrandi kaffidrykkju og stressi. Algengir gestir í starfsstöðvum okkar á þessum tíma eru háskólanemendur sem af ýmsum ástæðum kjósa að lesa undir próf í starfsstöðvum okkar fremur en heima hjá sér. 

Nokkur hundruð háskólapróf eru tekin á hverri önn í starfsstöðvum Austurbrúar og setur þetta óneitanlega svip á starfsemina á meðan törnin stendur yfir. Flest próf eru tekin á Egilsstöðum og á Reyðarfirði en einnig er þó nokkuð um próftöku á öðrum starfsstöðvum Austurbrúar í fjórðungnum s.s. á Vopnafirði, Djúpavogi og í Neskaupstað. Bæði eru þetta fjarnemar sem stunda sitt nám í heimabyggð en einnig er talsvert um að nemendur kjósi að taka prófin í heimabyggð þótt námið sé stundað annars staðar enda býður þetta nemendum upp á að koma fyrr heim í jólafrí en ella. 

Austurbrú býður ekki bara nemendum að taka próf í starfsstöðvunum heldur er þeim einnig boðið upp á lestraraðstöðu sem margir nemendur nýta óspart og dvelja löngum stundum við skrifborð hjá Austurbrú. Einn af þeim er Reyðfirðingurinn Sigurður Örn Sigurðsson, 34 ára, rafvirki hjá Launafli sem stundar nám í rafiðnfræði hjá Háskólanum í Reykjavík. Hann segir aðstöðuna framúrskarandi en hann hefur setið við skrifborð í Fróðleiksmolanum á Reyðarfirði í nokkra daga þar sem hann les stíft fyrir prófin sem senn hefjast.

„Kunningi minn benti mér á að það væri hægt að læra hérna, sá hafði notfært sér aðstöðuna, líkaði vel og mælti með þessu,“ segir Sigurður. Hann bætir við að þetta geti skipt sköpum í námi, sérstaklega fyrir próf:

„Að geta komið hingað og lært hefur hjálpað mér mjög mikið því að oft reynist erfitt að læra með fullt hús af börnum, sérstaklega er þetta gott þegar maður les fyrir próf,“ segir hann.

Austurbrú býður að sjálfsögðu öllum háskólanemum að lesa í starfsstöðvunum á meðan pláss leyfir og próftaka hjá auk þess velkomin. Tengiliður Austurbrúar vegna allra prófa er Katrín Reynisdóttir og best er að nemendur og kennarar hafi samband við hana vegna próftöku.