Útskrift úr stóriðjuskóla Fjarðaáls sem Austurbrú hefur umsjón með fór fram á miðvikudaginn í síðustu viku. Alls hafa nú 53 nemendur lokið framhaldsnámi við stóriðjuskólann.

Útskriftin fór fram í mötuneyti Fjarðaáls og á sama tíma kynntu nemendur lokaverkefni sín þar sem þeir tóku fyrir ýmislegt í framleiðsluferli fyrirtækisins.

Þetta er þriðji hópurinn sem lýkur framhaldsnámi en alls útskrifuðust tuttugu og tveir nemendur í síðustu viku. Þar af útskrifuðust sautján sem höfðu áður lokið grunnnámi og fóru því gegnum sjö annir og þá útskrifuðust fimm nemendur sem tóku framhaldsnámið eingöngu eða alls fjórar annir. Eftir þessa útskrift hafa fimmtíu og þrír nemendur útskrifast úr framhaldsnáminu.

Kjartan Glúmur Kjartansson hefur haft umsjón með náminu fyrir hönd Austurbrúar en það er byggt á námskrá frá Fræðslumiðstöð atvinnulífsins þar sem lögð er áhersla á að hanna námsbrautir fyrir fólk með litla formlega menntun að baki. Í ræðu sem hann hélt á útskriftinni sagði hann m.a.:

„Þetta er einstaklega góður og fjölbreyttur hópur sem nú útskrifast og hann hefur gert sitt allrabesta í náminu. Það væru örugglega misjöfn svör sem kæmu ef hópurinn væri spurður um gagnsemi námsins og hvað stæði upp úr. Námið er fjölbreytt og getur reynt á nemendur og þá er gott að hafa hugfast það sem sagt var á leiksskólanum sem ég vann á: Allir geta eitthvað enginn getur allt.“

Stóriðjuskóli Fjarðaáls á Reyðarfirði var settur árið 2011 og er stærsta fræðsluverkefni Austurbrúar frá stofnun hennar. Boðið er upp á þriggja anna grunnnám og framhaldsnám sem nær yfir fjórar annir. Að því loknu geta nemendur fengið námið metið inn í framhaldsskólakerfið, þar sem það nýtist til stúdentsprófs eða iðnnáms.

Óhætt er að segja að skólinn setji sterkan svip á starfsemi Austurbrúar á Reyðarfirði þar sem Fróðleiksmolinn, starfstöðin á Reyðarfirði, fyllist reglulega af fróðleiksfúsum og kaffiþyrstum nemendum. Skólinn er samstarfsverkefni Austurbrúar og Fjarðaáls og ekkert lát er á því eftir áramót hefja 24 nemendur grunnnám í tveimur hópum.

Mynd: Efri röð frá vinstri: Sindri Svavarsson, Guðmundur Gísli Svavarsson, Ágúst Rúnar Þorbergsson, Kristján Svavarsson, Úlfar Þór Svavarsson, Jeff Clemmensen, Marinó Eiður Gylfason, Piotr Marcjaniak, Teitur Már Símonarson, Kári Gunnlaugsson, Sveinbjörn Reynisson, Ólafur Gunnarsson, Ragnar Högnason og Sigurjón Þórir Guðmundsson.

Neðri röð frá vinstri: Poul Jepsen, Guðmundur Sigurðsson, Höskuldur Ólafsson, Rafal Baginski, Dawid Kizewski, Karin Birgitta Axelsdóttir, Starri Hjartarson, Magnús Ingi Svavarsson.