Festa – miðstöð um samfélagsábyrgð og Íslenski ferðaklasinn, í samstarfi við Íslandsstofu, SAF, Ferðamálastofu, Stjórnstöð ferðamála, Höfuðborgarstofu, Markaðsstofur landshlutanna, Austurbrú og Safetravel vilja bjóða íslenskum ferðaþjónustufyrirtækjum að sammælast um nokkrar skýrar og einfaldar aðgerðir um ábyrga ferðaþjónustu.

Ábyrg ferðaþjónsta er hvatningarverkefni og er tilgangur verkefnisins er að stuðla að því að Ísland verði ákjósanlegur áfangastaður ferðamanna um ókomna tíð sem styður við sjálfbærni fyrir komandi kynslóðir þjóðarinnar. Með ábyrgri ferðaþjónustu er átt við að fyrirtækin axli ábyrgð á þeim afleiðingum sem rekstur þeirra hefur á umhverfið og samfélagið.

Yfirlýsingin í heild sinni er hér að neðan og verður hún undirrituð í Háskólanum í Reykjavík 10. janúar kl. 14.30. Við óskum eftir þátttöku þinni í verkefninu og hvetjum þig til að skrá þitt fyrirtæki til leiks. 

Á sama tíma ætlum við hjá Austurbrú að bjóða aðilum á svæðinu að koma saman hjá Austurbrú á Búðareyri 1, Reyðarfirði og undirrita yfirlýsinguna sem verður varpað í gegnum Skype til Reykjavíkur.

Yfirlýsing um ábyrga ferðaþjónustu:

Í ferðaþjónustunni eru margar áskoranir sem snúa að samfélagsábyrgð fyrirtækja. Þar má telja aukinn ágang á náttúruna, að réttindi starfsfólks séu virt, að nærsamfélögin sem ferðamenn heimsækja fái sanngjarnan skerf af ávinningnum og ekki síst að öryggi ferðamanna sé tryggt og þeim veitt góð þjónusta. 

Við undirrituð ætlum að stuðla að ábyrgri ferðaþjónustu með því að:

1. Ganga vel um og virða náttúruna.
2. Tryggja öryggi gesta okkar og koma fram við þá af háttvísi. 
3. Virða réttindi starfsfólks.
4. Skila okkar skerfi til samfélagsins.

Við munum setja okkur markmið um ofangreinda þætti, mæla og birta reglulega upplýsingar um árangur fyrirtækisins.