Verkefnið um Áfangastaðurinn Austurland byrjaði sem grasrótarhreyfing. Ferðamálasamtök Austurlands (FAUST) höfðu frumkvæði að því að setja af stað verkefni um hönnun áfangastaðarins Austurlands fyrir rúmu ári síðan.  Verkefninu er stýrt af Austurbrú í samvinnu við FAUST og öll sveitarfélögin á Austurlandi. 

Markmið okkar er að bæta gott samfélag og gera það samkeppnishæfara um íbúa og fyrirtæki með því að skapa áfangastað með breiðri skírskotun. Þannig stefnum við að því að aukinn ferðamannastraumur verði í sátt við íbúa svæðisins, straumur sem jafnframt leiðir af sér aukna, fjölbreyttari og betri þjónustu við íbúana.

Með markvissri markaðssetningu og þróun á vörumerkinu Austurlandi, aukinni gæðavitund, faglegum vinnubrögðum og færni innan ferðaþjónustunnar verður rekstrargrundvöllur bæði starfandi, sem og nýrra og framsækinna fyrirtækja, betri sem leiðir af sér atvinnusköpun á fjölmörgum sviðum. 

Sú hraða þróun sem hefur átt sér stað í ferðaþjónustu á Íslandi felur í sér áskorun um betri stjórnun á ýmsum þáttum en ekki síður skapar hún ótal tækifæri sem brýnt er að nýta. Búsetuþróun er að mörgu leyti neikvæð og landsvæði/byggðalög eru í stöðugri samkeppni og stundum varnarbaráttu um mannauð og atvinnutækifæri. Með markvissri stöðugreiningu og skilgreindum leiðum til úrbóta getum við markaðssett Austurland betur sem ákjósanlegan búsetu- og fjárfestingakost innlendra sem og erlendra aðila.

Við notum aðferðafræði áfangastaðahönnunar í því skyni að þróa svæðið með áherslu á sjálfbærni. Hin þverfaglega nálgun er lykilatriði og byggir á samtali við samfélagið allt; sveitarfélög, fyrirtæki, samtök og íbúa Austurlands. Áfangastaðurinn Austurland hefur verið og er samvinnuverkefni, opið öllum sem áhuga hafa, ungum sem öldnum, með mismunandi bakgrunn..

Innleiðing á verkefninu er að hefjast þessa dagana og viljum við bjóða áhugasömum að fylgjast með framgangi mála. Stefnt er af því að opna heimasíðuna www.austurland.is í marsmánuði á þessu ári. Henni er ætlað að vera gátt inn í fjórðunginn þar sem aðalatriðið verður að upplýsa gesti með nýrri nálgun um hvernig það er að búa og starfa á Austurlandi. Á innri vef verður m.a. ljósmyndabanki, verkfærakista og kennslumyndbönd ætluð austfirskum ferðaþjónustuaðilum.

Það eru spennandi tímar framundan og erum við bjartsýn á að með markvissum áherslum náum við til nýrra íbúa og gesta.

Eftir Maríu Hjálmarsdóttur, verkefnastjóra hjá Austurbrú. Greinin birtist áður í Austurglugganum.